Steve Jobs教主一走咗，新iPad同iPhone 5都被評為新瓶，改變得最勁嘅，反而係配件配套！由第1代iPod開始沿用咗9年嘅30針頭終於退役，iPhone 5換上得8針嘅Lightning插頭。
果迷深信Apple係為機體修身而咁做，但亦有評論估呢招係由生意佬Tim Cook諗出嚟嘅cap水大計，事關Lightning線被發現內藏驗證晶片，目的係想趕絕非官方認證配件，連配件錢都自己賺到盡！事實係點都好啦，𠵱家最重要係諗點令iPhone 5有更多配件用，下文就為大家解答。
《FACE》Gadget版監修人
903 DJ Donald
USB駁iPhone最永恆
USB接駁代表
呢幾年無論喇叭、數碼收音機、投影機之類，都鍾意加個iPhone 30針docking，即插即播又有型，的確係賣點。但勢估唔到iPhone 5玩轉頭，當堂繑起晒用家手上嘅舊配件。
𠵱家想買立即用到嘅新iP5音響配件，都唔係唔得，好似呢套Onkyo Mini Hi-Fi咁，直接用Lightning cable駁手機落音響上嘅USB駁口就搞掂，有時反璞歸真嘅嘢先最方便，就算下代iPhone Apple又手痕換插頭，都冇有怕！
勁AMP元件
Onkyo CS-N755
日本音響老牌Onkyo，向來唔會隨波逐流，唔會亂加iPhone dock落佢旗下產品，結果今次俾佢扑中。（某啲潮牌喇叭機身冇USB頭）
呢套CS-N755嘅機面配備USB插頭，用原裝Lightning線連接後，Hi-Fi就讀取到iP5入面嘅歌，然後按照playlist咁播，筆者試過係100%work。而且套機採用咗部分旗艦級AMP元件，音色夠晒純，正過絕大部分iPhone喇叭！
Spec.：2路12cm單元．44W功率輸出．CD、MP3、FM、網絡收音機．光纖、同軸、USB、LAN
售價：$4,480
查詢：Onkyo（2429 8148）
輸入制式齊全，光纖、同軸、RCA都有。而個遙控都勁大個，好多設定都可無線操作。
市場實況
黐線！Lightning線炒到$398
雖然用USB線實駁到配件，但始終要有條Lightning線跟身先得，好多人大頭蝦，日頭拎返公司叉，收工唔記得拎返屋企，聽朝起身一定冇晒電！兩條長期放喺屋企同office，一條跟身，所以得一條iP5跟機cable實唔夠用。
以前30針cable就話山寨貨$20有條，想配多幾條都得，但Lightning線𠵱家連Apple Store同各大指定零售店都斷晒貨，真係想買條都難！上Apple Store訂雖然話最快1個星期出貨，不過聽聞全球都缺貨，好可能delay。唔想等又捨得使錢嘅可以去先達問吓，因為仲有少量現貨剩，不過炒到成$398一條，係原價$158嘅250%，炒幅仲勁過iP5。冇機炒，改為炒線，真係黐晒線！
iP5出機唔夠一個禮拜，全港正價Lightning線已賣斷，先達立即炒到$250，跟住呢排炒價仲升唔停，終於去到𠵱家$398高峰！
先達sales
阿堂
「每日都起碼有十幾人嚟問有冇Lightning線賣，我哋用正價入嘅貨，iPhone 5出機頭一日已經賣晒，𠵱家都要用炒價收返嚟，先有幾條擺喺鋪頭賣咋！」
Apple供應到市面嘅貨，原來有堆落咗喺大陸炒家手上，喺淘寶炒到150至210人仔一條，仲寸到留言話多人買得滯，唔得閒答買家問題，發貨亦會延遲，真係唔憂賣咁款！香港人要上強國網用炒價買嘢，勁諷刺！
淘寶山寨線
老吹賣期貨
好多人信強國山寨係冇嘢破解唔到。淘寶上面一早有人放出非原廠Lightning線發售，標價仲平到30人仔都有。點知筆者淘咗幾條問幾時到貨，就個個都話未有貨，發貨日期不停咁推遲，最新又話今個星期尾會有，睇嚟似賣期貨居多，條山寨線根本未研發成功，唔好幫襯住！
有淘寶賣家驚死人唔信，專登貼兩張線身晶片相出嚟證明佢條線有晶片，但一睇就知係假，個插頭根本唔係8針，流到裂！
又有人低價開訂後反口，話30至50人仔嘅價錢只係訂金，到貨後要人按市價補番差價，真係當人茂利咩！
不過最新真係有間大陸廠iPhone5mod貼晒相同片上網，公布已成功製造出代用線，過data同叉電都得，線身仲加埋LED燈光添，但就未公布幾時出，聽住先啦！不過條線定價都要US$19.9（約$155），即係同原裝線差唔多，咁我寧願等Apple Store出貨喇！
淘寶仲有人賣散裝Lightning線，其實係收機佬偷偷從收番嚟嘅iP5度拎出嚟賣，但炒價只係平原裝10人仔左右，勁賤！
Lightning線晶片防複製
外國網估cable內呢塊驗證晶片冇乜實質用途，純粹係阻止山寨廠複製條線，有傳成本因此貴咗7倍，但Apple實係諗住人人都要買原裝線，會賺得仲多！
條Lightning線炒到咁癲，主因係原裝線缺貨，傳聞中國啲配件廠因為趕製駁線，搞到班民工加班加到示威！另一問題係代替品老翻線遲遲未出，原來iP5出機後，有人爆開條線發現內藏有塊驗證晶片，推斷山寨線會過唔到data，甚至連電都叉唔到，Apple真夠絕！
藍牙駁speaker最方便
藍牙接駁代表
除咗靠Lightning線，當然仲有其他辦法駁到iPhone speaker啦！其實唔使諗到好複雜，用番iP5嘅基本功能就搞掂，就係藍牙！呢種以前唔算好多人用嘅iPhone speaker，估唔到𠵱家對唔想拖住條線播歌嘅人嚟講，已經係最簡單利落嘅方法，係爭在幫唔到iP5叉電啫！
迷你金字塔
GeoBlock
細細個金字塔形，底部有支架可放部iP5，畀你篤芒揀歌播或睇片，但其實中間冇實體連接，只靠藍牙無線傳歌發聲；內置埋充電池，出街都聽到12粒鐘。
Spec.：內置充電池．109×109×673mm．320g
售價：$599
查詢：Morgan Power（2827 2881）
只要開着喇叭，iP5再開埋藍牙後就會自動搵到個喇叭出嚟，配對後啲歌就傳到去喇叭。
巨型牛角
Edifier e30
若唔想用流動喇叭仔，想喺屋企聽靚聲的話，新款之中都有呢對牛角喇叭揀。佢有成部直身電腦咁高，棟喺屋企夠晒型，就連個波形遙控都靚仔過人。而且佢經過世界音響大師Phil Jones調校過音響系統，音色有保證。
Spec.：高音10W×2、中音10W×2、低音25W×2輸出．交流電．140×413×189mm×2．總重4.3kg
售價：$2,688
查詢：日通科技（2386 0928）
IRC IKR1222DABIP
睇完各種iP5駁喇叭方法，可能仲係有人掛住以前插dock播歌兼叉電嗰種方式。而且，屋企已經有docking喇叭，冇理由換手機要換埋配件，其實買個Lightning轉30針插頭（$238）就解決到問題。呢個轉插外國已經出咗兼有人測試過，雖然唔支援部分配件（例如HDMI輸出線），但叉電同駁喇叭等基本功能仍然用到。
至於喇叭亦有新出品，呢隻丹麥品牌IRC內置埋數碼收音機，雖然冇大班開咪，但日後一定用得着。
Spec.：DAB+、FM．3"單元．240×135×105mm．1.75kg
售價：$1,680
查詢：捷成洋行（2926 2300）
舊款dock代表
個舊universal dock駁到IP4，面積當然夠插轉插，不過真係小心新款Ligntning插頭支撐力冇以前30 pins咁好，裝拆時小心啪斷個插嘴呀！
發聲番梘
Philips SBM100
3.5mm接駁代表
其實大家可能已經遺忘咗一個最基本嘅駁喇叭方法，就係3.5mm插頭。只要你唔介意有線，用佢就真係完全唔使理iP5轉咗用乜cable頭，仲比其他無線接駁法慳電。好似呢個SBM100內置電池夠播6個鐘，而且仲可以聽埋收音機，彌補iP5嘅不足。
Spec.：3W輸出．內置充電池．107×71×36mm．0.1g
售價：$249
查詢：永利達（2407 1118）
Bose SoundLink Air
AirPlay接駁代表
無線駁喇叭，梗係唔只可以經藍牙，仲有AirPlay可以用。雖然iP5同AirPlay喇叭嘅對應過程多過藍牙喇叭少少step，而且一定要喺有WiFi嘅地方用，但音質就正過藍牙好多，仲能夠1部iP5同時駁多個喇叭添，麻煩少少都抵番晒啦！
型格音響品牌Bose，啱啱出咗旗下首部AirPlay喇叭SoundLink Air，除咗機身繼續保持簡約有型，亦用上高質釹鐵磁體單元，杜絕聲音失真問題。
Spec.：交流電．17.1×30.7×10.3mm．2.1kg
售價：$3,200
查詢：Bose（2123 9000）
iPhone 5電力急救
iPhone 4S年代已經俾人詬病嘅電量問題，去到iPhone 5拉大完個芒再加4G應用，機身仲可以再偷薄，睇怕電池位都唔大得去邊，買定後備電都得。
iP5改機款，Juiceback就肯定用唔番，轉用埋Lightning USB插頭後，究竟手頭上嘅「尿袋」外置電又用唔用得番？不過Apple認證嘅後備電未出得切，急用又買乜電好？即刻同你解構！
薄皮彩電
Aigo PB4020
唔想等Apple認證嘅IP5後備電，其實市面上好多電池，其駁位都係USB嘴，只要帶住條原裝Lightning cable出街，駁落去就充到電。由於個USB嘴都幾大粒，所以一般都係大電量款式，合晒出名大食嘅IP5使用。呢款Aigo PB402電池，9mm薄機身算係輕便，5隻色鋁合金外殼好似新款iPod Touch咁sharp，望落高貴！
Spec.：電量4,000mAh．1A輸出
售價：$288
查詢：Everbest（2541 2982）
USB插外置電
電池上有USB槽，駁番跟機條Lightning線，即可充電。
電池身形超薄，只有9mm厚，但依然設有電量顯示燈同一個LED燈當電筒用，認真有心。
呢兩種電out得
直走30pins線
3.5mm頭
救急蝙蝠
Batman迷你充電
睇佢細粒成咁，都知電量有限。其實佢packing都講明「應急用」，內置600mAh電量，真係同lover講句電話無電就好嗱嗱聲收線。不過見到個黑底銀蝙蝠logo，就算唔係好實用，死硬粉絲點都要搶啦。
Spec.：電量600mAh．500mA輸出
售價：$148
查詢：JC Shop（3102 2783）
USB接駁代表
拆開面蓋，仲要再插番個跟機嘅原裝轉插先有得駁條Lightning線。
雙槍雄
PowerSmart
依家好多人都Apple、Android兩機並用，一個唔好彩齊齊無電，惟有靠呢種有兩個USB位嘅PowerSmart。雖然身形細細，都有成5,200mAh電量，足夠叉滿iPhone 5同GALAXY Note II有餘！
Spec.：電量5,200mAh．1A×2輸出
售價：$430
查詢：JC Shop（3102 2783）
兩個USB槽嘅輸出電量都有1A，即使兩機一齊充電，都唔怕等好耐。
瀛味曲電
JAPTRON MV560
成日話買電要有牌子，好似日本出嘅JAPTRON就感覺夠穩陣。呢款MV560設計到葫蘆柱形咁款，更好揸手，方便心急user一邊插住後備電、一邊用電話。
Spec.：電量5,600mAh．1A輸出
售價：$318
查詢：2the Max（2305 3877）
插口、開關同電量顯示全部擺埋一齊，方便操作。
揀電有法
有外國網站拆開部機，發現iPhone 5電量只係比4S多少少，由1,420mAh加大到1,440mAh，認真失望。
後備電出到成行成市，要揀啱iPhone 5用，就要睇係咪有USB槽。不過要邊嚿好啲、邊種至啱自己用，就要睇清楚規格啦！
1電量單位mAh
最基本一定要知包裝上嘅mAh係指電池嘅電量啦！如果你係用iPhone 5，內置只有1,440mAh，其實買款有2,000mAh的後備電已經夠用。
主流手提Apple iPhone 5:1,440mAh
GadgetApple iPhone 4S:1,420mAh
電量一覽Samsung GALAXY S III:2,100mAh
Samsung GALAXY Note II:3,100mAh
平板Apple The New iPad:11,666mAh
Samsung GALAXY Tab 2 10.1:7,000mAh
2輸出電量
電池背面或者包裝都有output一項，所指係充電速度，值得留意。如果電量大，但充電速度慢，分分鐘插住嚿後備電，等成個鐘都開唔番機。一般有1A（或寫成1,000mA）的充電速度已經可以接受，約1.5小時已可以充到iPhone 5一半電量。
3電池設備
自問一身gadget，最好揀可以充2部以上嘅後備電。但要留意插頭充電速度係咪一樣，如果2個都達1A以上，就值得一讚。另外如果有埋電量提示，就可以避免over-charge，令後備電更耐用。
唔想電池爆炸專家有say
《蘋果日報》資料圖片
早年成日發生後備電爆炸嘅case，想避免，理工大學機械工程學系工程師盧覺強就話千祈咪買「山寨電」。他解釋：「好多雜嘜電入面無短路裝置，會引發火花令到電池有自爆危機。一般人唔會拆開電池睇，最穩陣都係買有Apple認證，或者有品質保證嘅品牌。」但買咗正牌電，如果用得唔好，整壞短路裝置，一樣有機會自爆。「有兩個情況會整壞，第一係成日將個電池扔來扔去，隨時整壞內部零件。另外擺係太陽下曝曬，搞到電池內部膨脹，亦會影響裝置。」
iPad mini Vs Galaxy SIII mini
愛鬥細
網民除咗日日提住新USB線問題，仲瘋傳Tim Cook背棄教主生前教義，食言出7吋iPad mini搶市場，連華爾街日報都講到似層層，話10月17號就發布，更已經有唔少dummy機圖片同資料流出，但記者覺得最唔可信係個售價，Apple點會做一部同iPod Touch一樣賣US$299嘅tablet呢？同一時間，靠大芒機殺出條血路嘅Samsung，竟然發布一部GALAXY S III mini，屏幕跟IP5一樣係4吋，𠵱家係咪鬥完大嚟鬥細先？
傳聞Spec.：7.85"Retina．A6處理器．只有WiFi版本、內置32GB、199.89×134.6×7.4mm、US$299（約HK$2,302）
專爆Apple料嘅科技網站9to5Mac，聲稱有iPad mini測試機喺手，拍埋部The new iPad度，就知細咗一大截。
另一張近照，睇到iPad mini都係用Lightning插頭，機背仲有32GB字樣，而且機邊亦唔似The new iPad咁修身。
三星玩細
三星就堅出呢部Galaxy SIII mini，雙核心、4吋芒、500萬像素鏡頭。（售價及推出日未定）
林志穎又嚟？
之前iPhone 5未發布，林志穎發布一張玩機圖，今次iPad mini未見街，林志穎又有機玩咁巴閉？事後證明只係網民惡搞圖。
奴Comment
出iPad mini咁咪打Steve一巴？不過我都會考慮，因為7吋真係幾合手形，出街用好睇過iPhone個細芒，而且用機都唔算論盡。屋企想睇大芒話，我又可以經Apple TV駁大電視睇！至於GALAXY S III，我就覺得唔多需要出多部Mini版喇，不過佢應該會平，入門人士合用！
iPhone 5市況update
先達友Vs大陸艇仔
上星期十．一黃金周完結後，大陸莊家更加踴躍接貨，以致回收價上週二同三再次急升，16GB白機一度重上$8,350高位（黑機平$100）。雖然之後出現過輕微回吐，但先達友收機意慾明顯比兩星期前強，因為上台出機嘅人已經放得七七八八，𠵱家放嘅多數係Apple抽獎機，數量有限。再加上近日有大堆艇仔分布先達四周，攔途兜搭去緊先達嘅人放機，先達友更加難收足數交上大陸，所以出行力收機，預計短期內回收價唔會大插。
呢個禮拜先達鋪為引人放機，已經無所不用其極，呢間直頭貼張100人仔出，極具霸氣，但賣機當然係畀港紙你。
呢間更標出$8,800呢個只出現過出機首日回收價，但求引咗人去問先，之後先報真實價錢$8,300。
先達對面百老匯對開位置，呢排日日都有成10個大陸艇仔攔途截人放機，實行同先達友鬥搶。
一有人放機，立即就地check機兼數銀紙畀錢，搞到行人路經常塞人！
