媽咪姐人面廣，facebook嘅朋友list真係水蛇春咁長，仲長加長有！不過，最近上fb就見到風水師吳佩孚公開話，唔再同鍾舒漫（Sherman）做friend，仲delete咗佢㖭！原因係Sherman向拜太上老君嘅吳佩孚傳福音，令吳師傅感覺俾人挑釁。
話時話，真係估唔到鍾舒漫同吳佩孚係friend喎。媽咪姐即刻打俾吳師傅問問，佢就咁話：「我同Sherman係fb嘅friend，平日好少見。其實我好欣賞佢嘅歌，個人又靚女。不過Sherman個人迷咗！所以我依家都唔聽佢啲歌。佢明知我做邊行，但就send傳教訊息去我個inbox，又話有啲嘢係異端。可能佢係一番好意，但你話咁係咪挑戰呢？」稍安毋躁，等媽咪姐講句公道說話，做人應該互相包容嘅，點都好，以和為貴！
facebook反面
周一（15日）吳佩孚喺fb貼文，公開話delete咗向佢傳教嘅鍾舒漫，好快就有三百幾個friend話like。後來吳師傅就留言補充，話今次係有人挑戰，同耶穌同上帝無關，好識做人。
