在這個集體反智的年代，要成名好睇表面。高海寧（高Ling）和金剛核心外圍已堅過石堅，高Ling天然巨咪，唔使郁都接Job接到手軟；金剛純正「歪音」廣東話，離奇殺出一條血路。但要Last得耐更要講核心有乜餡，原來他們核心內圍尚有王牌未出。咁，你哋玩晒啦！
金剛真係好犀利，有型、好戲、好口才、識做人……聞說這類全能藝人「千載難遇」。其廣東話更是他的Trademark，純正歪音，聽完笑死冇命賠，一個人如此有深度，難怪在圈中這樣吃得開。
講起自己的廣東話如何珠落玉盤，金剛眉飛色舞，狂標榜進步神速到自己都驚：「真係進步巧（好）快，雞（幾）乎已成為我第一語言。記得第一日嚟香港，朋友就教我一門五傑（粗口），話驚我畀人鬧都唔知，依家我好叻呀，只係有啲音講唔到，例如食屎（試食），我咁聰眠（明）冇理Yo（由）讀唔到嘛！」
普通話得四聲，廣東話就有九個音節，「天才」金剛誠言很難學，與其有些字講極也講不出，就由得自己錯下去，他說：「真係講唔到的話，又要講喎，是但啦，就以錯落去心態照講，估唔到大家咁受落，都鍾意聽我講特色金剛廣東話，但我好經（驚）呀，依家我廣東話愈來愈正，如果繼續係咁，我驚冇人搵我做嘢！」
樣樣皆精「舞」弱點
始終這個社會最講經濟效益，金剛說話技巧已是他的搵食絕活，主持、劇集、廣告如雪片飄至，想唔接都難：「是咁的，煙（因）為我講唔正啦，多咗好多Job，依家搵食都係靠佢，計過喇！就係咁夠我買到樓添，講笑，邊有咁多，但都好感恩！」
金剛核心外圍已強到冇朋友，原來他核心內圍還有好多內圍，自詡萬能藝人，金剛，你係得嘅！他說：「我係好強喎！但做胃（藝）人唔可以故步自封，要不停增值。好似我咁啦，演喜劇當然茆（冇）問題啦，但係要我做沉重角色真係好難，所以我學緊方法演技囉！」
金剛自誇琴棋書畫樣樣精，連唱歌也可冧盡老中青：「我唱歌唔係巧（好）勁，但係唔渣囉，打個屁（譬）如啦，我個Level未去到張學友嘅，但都有Eason（陳奕迅）級數！」可惜金剛歌精，並非舞勁，天才也有致命弱點時，他說：「我乜都叻，就係跳舞唔叻，唔知點解硬係手腳唔協調，可能我有四肢不能同時有節奏症候群啦！茆（冇）辦法，人有缺陷美係好嘅！」
後記：末日有Delay
不是說誑，金剛並非只得講「廣東話」講得好，他還很有內涵。當吹水討論2012世界末日，他即權威地說：「瑪雅曆只係講到第5個太陽紀完結，並非講世界末日，牛頓有份手稿都晏（暗）示世界末日係206幾年，信我，如果今年世界末日就搵我算帳！」如果真係世界末日，點搵你呀！
提起高海寧（高Ling）你會想起甚麼？是她穿上惹火比堅尼在《為食總司令》中，與陳庭欣陶醉地浸泥漿浴？抑或在《五覺大戰》中穿上逼爆「紫荊俠」造型在車上大玩飄移派米？
高Ling於2008年的港姐競選雖未有進入三甲，但其豐滿的身材和性感形象成功成為其標誌，讓她在無綫獨當一面，更封「新一代咪神」！她形象性感，但絕不介意被定型，因深信「性感」不是罪：「我記得當初都幾介意，不過經理人同我講過『性感』可以令人記得我，而且性感又唔係負面，係每個女人都可以散發到，只係近年嘅風氣令到『性感』變得負面！而我亦深信自己只係做嘢性感，而唔係無啦啦、誇張賣弄性感就得！」
不知何時起，手掌的「事業線」移師到女性的胸前，而「事業線」愈長等於事業愈順暢，正因高Ling「命格」好，所以上位亦很快！但她的性感背後，是非也接踵而來，而她往往無辜中箭而感到鬱鬱寡歡：「我最唔開心係因為『性感』形象而被人誤解，啲人覺得性感嘅女仔就係有機心、鍾意有錢人同貪慕虛榮，但我絕對唔係呢啲人！」
望憑《天梯》獲提名
而提起失實的傳言，高Ling更覺得被屈，不禁愈講愈火：「曾經有報道話我同富商A一齊，但睇完之後真係得啖笑！篇報道影響我嘅形象，我亦好小心維護形象，雖然我性感，但我自問冇做過一啲違背自己良心嘅事！如果我真係做咗，你咁樣寫我，我覺得抵囉！問題係我冇，所以覺得唔公平同唔開心！」
踏上性感女星之路，通常戲路也難以殺出重圍，充當花瓶者十居其九，可以做舒淇的又有多少個？可幸高Ling的演技終被發掘，監製獨具慧眼揀中演出劇集《天梯》，劇中她收起性感，穿上旗袍婀娜多姿，扮演風韻猶存的「蒸生瓜」！本以為高Ling演戲經驗尚淺，演技大多流於表面，但竟獲網民讚賞！而高Ling被網友發掘到內涵也感到格外開心：「其實今次真係好緊張個角色，同時亦好開心觀眾會鍾意我！今次係第一次有入劇嘅角色，我知道拍劇嘅機會唔多，所以一有機會就分外珍惜，做角色之前都會問好多唔同意見，希望遲啲會有多啲監製搵！（今年台慶頒獎禮希望捲土重來？）舊年係靠飲食節目提名飛躍進步女藝員，希望今年可以靠拍劇再次提名啦，攞唔攞到獎都係題外話！」
後記：寫情信有機
哪個男人不愛性感女神？高Ling與生俱來一副天使面孔、魔鬼身材，難怪不少男生拜倒石榴裙下，但多人追絕非好事，她苦惱地說：「入咗行識男仔反而更加難，所以要謹慎選擇！講真有人追你都唔知佢有乜企圖，所以都要用時間慢慢揀！如果對方用金錢攻勢追我係唔Work，名牌我唔會收，何況自己都買得起，反而你寫情信，用時間心思去追我更奏效！」
金剛憑特色「歪音」廣東話愈撈愈掂，俘虜老中青粉絲。
高Ling行性感雖然極速上位，但要承受不少壓力。
金剛與「神獸」蔡慧欣合作《五覺大戰》。
高Ling（左）和陳庭欣在《為食總司令》中齊浸泥漿浴。
