日本漫畫大師赤塚不二夫嘅《小魔鏡》（電影版改為《魔鏡變變變》），講女主角可利用魔術鏡盒變身，因而喺70年代風靡港日兩地少女漫畫迷。今年係其誕生50周年，東映電影公司決定開拍真人版。消息一出，即引嚟各方有分量人馬如深田恭子、上戶彩及石原里美等都希望成為女主角加賀美厚子。深田恭子務要爭取到手，打盡人情牌，可惜仍然搶「鏡」失敗，事關女主角，落喺從未參與爭奪戰嘅綾瀨遙手上，而男主角亦由小栗旬變為上位型男岡田將生。深田恭子呢位過氣一姐今勻真係失威。
論人氣、深田恭子根本唔夠綾瀨遙揮。綾瀨遙自從《螢之光》干物女一角走紅後，人氣飆升，主演嘅電影及電視劇都大受歡迎。近年更成為日本影圈搶手貨，加上形象健康，廣告亦拍到冇停手，單係舊年，已經勁賺4千萬港幣，威盡日本藝能界。電影公司梗係以利益為大前提，賺錢先係王道，取遙棄田，正常不過啦。
綾瀨遙飾演嘅美厚子，雖然有大人外表，但智商同腦力依然得10歲，所以做嘢就撞板多過食飯。
日劇一線小生谷原章介（左）喺戲入面飾演公司專務，將公司危機歸咎喺企劃部嘅岡田將生身上
公司面臨被收購危機，綾瀨遙為咗岡田將生，決定利用魔法變身，令公司起死回生。
變身22歲大人嘅遙妹，對公司嘅白領精英岡田將生一見鍾情
你咪話呀，飾演10歲美厚子嘅童星吉日里琴，個樣同綾瀨遙真係好似㗎。
遙妹嫌棄將生
電影公司將遙妹喺戲中造型貼滿地鐵車廂為《魔》造勢。
其實唔單止女角引爭奪戰，男主角亦一樣出現替換情況。《魔鏡變變變》（香港10月25日上映）開拍初期，公司將小栗旬換上岡田將生，惹起綾瀨遙不滿，認為岡田仲未夠班，所以拍攝期間，勁擺阿姐款，同岡田更係零交流。你咪理，慘得過電影公司buy佢，除咗將原著角色由小學5年級改為22歲成人外，又搵咗班有名有姓嘅阿哥阿姐：好似谷原章介、吹石一惠、香川照之等做大茄，夠晒「飛士」。
魔法夢想成真
搞咁多嘢，劇情發展又係點呢？故事講10歲嘅美厚子得到魔法鏡盒後，只要對住塊鏡唸咒，就可以隨意變身，要變乜就變乜。美厚子貪玩，一時變女警，一時變空姐，最後變做OL，入咗一間化妝品公司做嘢，仲迷戀同事早瀨尚人（岡田將生）。其後更以新奇趣怪意念，將化妝品公司從被收購危機中拯救出生天。
雖然有人認為遙妹喺戲中造型好壞參半，點講都好啦，人哋當旺，戲賣得好就係神仙啦。
電影9月1日喺日本開畫，戲中一眾演員均有出席，當遙妹上台時，差啲仆低，好彩香川照之（飾演「魔鏡之神」）手快扶住，事後遙妹尷尬傻笑。
