有劉爸爸陪開香檳，迎接51歲生日嘅華仔份外開心。
今日係劉德華51歲牛一，有妻有女嘅佢家鬼咁幸福，之前15號華仔喺灣仔會展搞咗個中國風生日派對，一早同佢口中嘅家人，即係各地歌迷齊齊慶祝，嗰日華仔嚴禁家人影相，不過前幾日佢終於將大批相擺上華仔天地官網，仲用《相親相愛》寫咗篇文同大家分享㖭。
華仔坐正中間俾女粉絲圍住伴唱，一王九后夠晒氣勢。
華仔企上枱又唱又跳，台上嘅粉絲拍晒手掌打氣。
生咗囡囡向蕙嘅華仔，拖住小女孩粉絲即刻慈父上身。
紅衫壽星公壽星公華仔着住紅色長衫，成個利是封咁，夠晒醒神兼喜氣洋洋，華爸爸仲一齊開香檳慶祝，連喺英倫殘奧攞咗金牌嘅香港劍后余翠怡都有到賀，做司儀嘅區永權就帶埋老婆同兩個囝囝跟華仔合照。呢晚華仔唔只企上枱唱歌跳舞娛賓，連歌迷們都粉墨登場，女嘅伴舞合唱，男嘅耍劍舞棍，華仔都畀晒like狂讚：「台上家人演出精采，比得上我的演唱會水平，厲害！」難怪華仔話睇到家人相親相愛，就係佢最大嘅生日願望。
此外，華仔喺電影《寒戰》客串扮保安局局長，佢話劇本好吸引，本來想擔正主演，但無奈啱啱家有喜事老婆生咗個女，只可以友情演出。
