苟芸慧（左）同岑麗香兩個新高登女神，手拖手齊齊搵真銀。
苟芸慧同岑麗香兩個新高登女神前晚一齊喺尖沙嘴出席時裝騷，岑麗香上台行騷，女神輩分高半級嘅苟芸慧就有位坐，兩個女神喺現場拖晒手咁影相，不過轉頭要求佢哋一齊做訪問，岑麗香就一完騷即失蹤走人。
人氣急升嘅岑麗香，噚日又同應屆港姐出席記者會。
苟芸慧話唔覺得岑麗香避開佢：「公關話佢要趕住返廠，我哋都有影合照啦，唔緊要，下次會有機會。」佢仲話兩個人都有咗個女神稱號，連感情都好咗：「大家鬼妹仔，鬼聲鬼氣。」
胡杏兒否認撻着超級巨聲大孖周志文。
杏兒拒姊弟戀同場仲有胡杏兒、周麗淇、Alice B.、松岡李那等，胡杏兒又傳同超級巨星「大孖」周志文撻着，佢話：「大孖細我十年，仲要有女朋友，細太多啦，十年真係唔得。」而松岡李那就話同BIGBANG喺日本係同公司，但唔知久保杏奈同BIGBANG勝利係咪拍拖：「有時同杏奈去唱K，佢好飲得唔易醉。」
此外，岑麗香噚日同陳庭欣及應屆港姐喺尖沙嘴出席「超級國家盃2012馬球會」記者會，早前有份去三亞拍攝《衝上雲霄II》嘅岑麗香話，唔知吳卓羲同梁靖琪喺泳池酒後亂性：「我同劉俐、楊潮凱，仲有班幕後工作人員去咗另一邊游水，我哋只係玩鬥快游水同潛水，唔知其他事。」
