同胡杏兒甩拖後，一直喺外地拍攝台劇《麵包樹上的女人》嘅黃宗澤（Bosco），上星期終於回港為新劇《好心作怪》開工。冇見幾個月，Bosco外形黑實咗唔少，驟眼望好似憔悴咗又瘦咗，接受記者訪問時，佢又一副慘樣話同杏兒仲有短訊聯絡，又話復合等天安排，情聖一樣。
跟住上周四（6日），成班記者又圍住剛返TVB嘅Bosco，問佢情傷好番未，此時同劇嘅許紹雄行過就忍唔住搭嘴：「我攬過Bosco，佢冇瘦過，佢冇事喎！」有劇組二五仲爆料話：「Bosco開咗幾日工，一見到我哋，同平時一樣攬頭攬頸玩到癲，佢仲同周麗淇講笑話，完全冇問題喎！」講真，一向樂天嘅Bosco有咩睇唔開吖？正如佢所講：「分手又唔係世界末日。」扮唔開心都係為咗迎合大家需要啫！
Bosco一返香港就孖住靚女周麗淇拍劇，其實點會唔happy吖？你睇佢表情幾鬼馬！
Benz雄係前輩，挑通眼眉，見大班記者圍住Bosco，即刻話佢無咩事，係大家諗多咗啫！
