梁靜茹噚日喺西安嘅歌友會因為反日暴亂而取消。資料圖片
因為日本政府買釣魚台引發中國人反日情緒爆燈，內地同胞喺多個城市搞反日示威變成暴亂，咁啱台灣歌后張惠妹前晚喺湖南長沙演出後，竟然惹嚟湖南電視台製片李銳喺微博話曾去日本發展過嘅阿妹好親日，好有煽動性，妹迷即刻鬧到佢狗血淋頭。
前晚喺上海開個唱嘅阿倫，都喺微博表達內地反日示威嘅感受。CFP圖片
有內地反日示威者拉橫額寫上「活捉蒼井空」的字眼。微博圖片
小豬取消東京個唱雖然最後冇事，但內地嘅反日示威越嚟越激，梁靜茹同林宥嘉噚日喺西安嘅活動都叫停，五月天原本29日嘅西安演唱會都改期到下月27日，羅志祥（小豬）亦決定取消本月29、30日舉行嘅兩場東京演唱會。
至於香港，中日混血嘅裕美噚日喺銅鑼灣出席活動時話，好擔心下月去內地登台同宣傳，諗住押後，尤其係佢揸日本護照，裕美醒目咁話身份中立，只想件事和平解決。喺香港做嘢嘅日模久保杏奈噚日喺荃灣出席活動，都話取消兩單要返內地做嘅工作。
Angelababy、譚詠麟、馬浚偉、黃貫中、李珊珊都喺微博表達意見，Baby直言：「對自己人暴力，解決不了現在的問題。」連喺上海開個唱嘅譚詠麟亦呼籲：「我們先不要內亂，槍口對外上下一心。」另外，有網民投訴無綫點解會派女記者陳嘉欣返內地採訪暴亂。
