FBI同好多香港人一樣，過慣情人節、聖誕節，七夕？唔興囉。不過多得微博同面書流行，俾強國同台灣同胞薰陶得多，先至知，原來人哋啲情人喺七夕，示愛求婚宣示主權，個個都鍾意揀呢日。
上星期四（23日），農曆七月七日，微博雙雙對對晒恩愛，竟然俾FBI見到上個月至單方面宣布飛甩吳卓羲嘅張馨予，晒完大大紮紅玫瑰，再轉發內地小生李晨嘅示愛微博，正式公開同新歡嘅戀情。係嘅，吳卓羲一腳踏幾船，花心唔抵幫，不過個新歡咁大段示愛微博，把口𠺘過油喎。一齊冇耐，就玩山盟海誓：「今後，天涯海角，有我相伴！」李晨最近接受訪問，仲話兩個人相處關鍵在於要確定在一起是否有結果，如果唔了解就唔好浪費時間，即係話佢認定張馨予做老婆喎。
上月中至話同吳卓羲分手，隔一個月馨予已經興奮晒新歡紅玫瑰，復原進度都算快。
七夕正日十一點，李晨點名張馨予發出示愛微博，冧爆張馨予即時轉發，傳足個多月緋聞嘅二人正式公開戀情。
