俗語有云，一世流流長，難免遇上個人渣。連詩雅比較唔好彩，才24歲，就遇上過兩個。
16歲的初戀，大她12歲的永安太子爺郭永淳背妻偷食，不知情下做小三。
第二個男朋友，夜場DJ曲赤，夾啱出碟前後流出陳年親密照，認唔認賣女求榮都好，沒有連詩雅哪有人知道曲赤是誰，無可否認抽水成功。
然後是父母離異，搬家轉學，喜愛夜蒲，抽煙喝酒，通通發生在16歲那一年。
小小年紀，連詩雅就說，她不相信愛情了：「事業上嘅信心我慢慢建立緊，但係對愛情嘅信心就愈變愈少，兩個人，呢一秒相愛，下一秒形同陌路，對住另一個……我覺得好得人驚。」
凡事都可以兩面睇，連詩雅的玉女形象雖然保不住，但是寫下自己心聲的電影主題曲〈I'm Still Loving You〉YouTube點擊將近600萬，新歌〈到此為止〉和〈好好過〉都是全港各個單曲銷售榜的冠軍。
人變得有歷練，歌聲也變得更動容，不論好的壞的，一切都因為愛情。
不相信愛情
15歲開始做兼職模特兒、21歲簽約唱片公司，2010年，22歲的連詩雅以光鮮亮麗的美少女形象推出處女碟《Moment》正式出道。睇得又唱得，人氣急升的同時，愛玩愛蒲的過去亦漸漸浮面。從飲酒食煙夜蒲照、到早過楊愛瑾搭上人夫郭永淳，然後是今年5月，與前男友吻照離奇流出，連詩雅因此召開記者會，哭着承認，16歲時，玩過亦「搞過」。
事發當天，我喺屋企收到消息。媽咪見到我咁嘅樣，乜都冇講亦冇問，淨係畀咗個hug我。
個囡發生呢啲嘢，應該冇人傷心痛心得過媽咪，但係我媽咪就係啲咁strong嘅女人，比我strong十倍，幾日喺屋企陪住我，兩母女飲茶睇戲、搵番啲我細細個嘅嘢出嚟講，傾句偈、叫我食嘢，把聲嘅音調都比平時高幾度，懶輕鬆懶冇嘢咁，無非想我好過啲。
有時，就係要唔好嘅事發生，你先至會知，身邊有幾多人對我不離不棄，有邊個會陪我一齊作戰……嗰啲唔好嘅人，我唔想再評論，但係嗰啲過去，我承認係我自己。
我想講，冇過去，就唔會有𠵱家嘅我。以前，一班人黑麻麻飲酒講笑，好似淨係需要享樂，乜都唔使講，我鍾意蒲係覺得可以減壓；玩過，我先至知，蒲好浪費時間，原來快感同滿足感，喺我上台唱歌、得到掌聲一樣可以搵到。人，淨係會活一次。
一段人生，有波折先至完美。一世人一帆風順，行出嚟講故事：「係呀，我好lucky！完！」咁樣有咩意思？
其實我要多謝遇上過所有唔好嘅人同事，冇唔好，又點會顯得「好」珍貴？
歌曲網上點擊首首過百萬，連詩雅親自填詞的《喜愛夜蒲》主題曲〈I’m Still Loving You〉點擊更高達570萬
今年5月，與前男友親熱照突然外洩，連詩雅在唱片公司開記招，聲淚俱下。
下月30日，連詩雅與同唱片公司組合Dear Jane將在九龍灣展貿中心舉行入行以來首個賣票演唱會
早熟女孩
連詩雅說，自己從小就生得高䠷，外形長得比同齡女孩成熟，所以16歲就能神不知鬼不覺溜進夜店。口口聲聲喜愛夜蒲去減壓，16歲人仔，壓力從何而來？父親做生意、母親在加拿大領事館有個高薪厚職翻譯工作，從小家住九龍塘讀慣名牌國際學校（英皇佐治五世學校，簡稱KGV）的掌上明珠，壓力從何而來？
屋企咁多年來，雖然未至於家嘈屋閉，但係問心並唔係熱鬧和睦，媽咪話，好多嘢佢講唔到畀我聽，要等我大個自己去經歷，做自己嘅決定，佢又話，兩個人唔夾，因為一啲原因夾硬一齊，結果係兩個人一齊辛苦……16歲嗰年，佢哋決定離婚，我從來冇怪過爹哋媽咪，佢哋已經為咗我維繫咗好多年，我都成16歲人，無謂咁自私，單單為咗俾人睇到我有一個好似好完美嘅三口之家。
我由細到大住九龍，讀KGV，16歲嗰年，我同媽咪大屋搬細屋，第一次搬去香港島，轉校入咗西島中學（國際學校）。一時之間，我要適應同媽咪兩個人生活，適應從來冇住過嘅居住環境，同一個朋友都冇、完全唔知點融入小圈子嘅新學校……我媽咪係女強人，我覺得自己好似佢，同佢一樣盡快適應新環境，迫自己長大。
我17、8歲已經經濟獨立，已經調轉頭係我請媽咪食飯、買嘢送畀媽咪，入行以後我出盡力好急躁咁去證明自己、增值自己，都係為咗媽咪。媽咪年紀好大至生我，我今年24歲，佢已經60幾，我細個已經浪費咗好多時間，我未試過好似𠵱家咁想做好、更知自己要啲咩，都係為咗媽咪。
蒲過玩過經驗豐富，連詩雅特別受導演錢國偉重用，接連主演兩集《喜愛夜蒲》，而且集集激情
連詩雅與唱片公司師兄方大同是舊相識：「我10歲已經識佢一齊玩，我哋嘅媽咪係high tea腳。」《蘋果日報》圖片
長跑人生
樣靚身材正，成個虛有其表嘅模咁款，連詩雅要養起媽咪的一番豪言壯語，絕非得把口。17歲開始，她已經同時兼緊模特兒、英文補習同加拿大領事館翻譯三項工作，簽約華納唱片頭一年，零收入又被禁止做模特兒工作，她每週六天每天十小時擔任baby gym導師，捱到172cm得番100磅。然後是愛上長跑練氣練韌力，現在的連詩雅，和16歲喜愛夜蒲的那個集郵少女，早不是一個人。
一入行，個個都話我得個樣，係另一個模。
我新人一個，咩都唔識，身邊個個好心教我、傳授我經驗，我口講「知道、知道！」，明明一知半解好迷惘，但係又好心急谷自己，想證明畀人睇我唔係得個樣、唔係玩玩吓。
一年前，我為咗練氣去跑步，由本來捱唔住三分鐘，跑到一個鐘，由本來情緒負面又急躁，跑咗一個全新嘅我出嚟。
你知唔知，當你跑咗三公里，以為自己盡咗，其實未盡㗎？
你知唔知，本來你係跑開三公里，當你可以身水身汗跑到五公里，幾有成功感？
跑步之後，我終於明白，第一年點解自己咁想做到都做唔到，機會重要、經驗更加重要，第一次上台冇可能唱到第十次上台嘅感覺，有啲嘢急唔嚟。跑步同做人、做呢行都係一個道理，信心、經驗同韌力都係練同累積出嚟。
15歲開始做model、16歲開始蒲，連詩雅承認曾經又煙又酒愛蒲兼爛玩
16歲時，父母離異，連詩雅從此以後與母親相依為命。
有啲嘢
問心，一開始看到連詩雅入行做歌手，我有份睇死：「咪就係得個靚樣同對腳長囉，鬼識唱歌咩！」
然後，蒲照親熱照一波波曝光，我亦有份藐爆：「喜愛夜蒲，唔慌好人。」
不過，聽過她唱歌、看過她寫詞，再和她做了這次訪問，老實說，這個才24歲的小女生，除了對長腳同過去，真係有啲嘢。
