平時少提家事嘅大美人林青霞，最近又俾人傳佢同老公邢李㷧婚變，仲話女方攞咗11億贍養費，講到實牙實齒咁。
事實係人都知邢李㷧好錫老婆，06年仲用咗1.3億買咗飛鵝山3萬幾呎地皮，打算起間豪華皇宮。間屋足足起咗六年，媽咪姐就八到青霞姐姐近排嫌間屋外牆太淺色，佢老公就即刻叫人改髹深啡色。
前幾日媽咪姐再去過間屋，見到成班工人出出入入鬼咁忙，有人仲拎住個魚池濾水器入去；又見到四周裝晒CCTV，睇嚟青霞一家就快搬入去。住舊屋成日俾人傳離婚，希望新屋風水有利家宅安寧、婚姻和合啦！
舊年仲見間屋外牆髹咗淺啡色，點知前幾日再睇就變咗深啡色。就算成間屋翻轉再起過都仲得，最緊要青霞姐姐滿意就得啦！
熱愛種花養魚嘅林青霞，後花園會起個荷花池養錦鯉，媽咪姐當日就見到有工人拎住個魚池濾水器入屋。
