娛頭求愛短訊翻兜李泳豪鼎爺怒斥楊思琦多X餘！2012年08月09日~~第1170期香港《壹周刊》
被指已接受做單親媽咪壓力，投入工作，為奧運講跳水的楊思琦，看似與舊愛李泳豪及女兒經手人吳帥了斷得一乾二淨，但實則不然！原來近日楊思琦為番個水泡，竟然面都唔要，以求愛短訊翻兜，被她當日狠撇傷透的李泳豪。
偷食加上女都生埋，醒晒的李泳豪一於拒食回頭草，而承認楊思琦向兒子發過翻兜短訊的鼎爺李家鼎，亦不屑對方厚面皮死纏爛打，警告她唔好搞咁多嘢，且直斥說：「多X餘！」
另外，近日無綫內部亦傳出楊思琦跟吳帥關係未斷的講法；與吳帥拖拖拉拉，又想翻撻李泳豪，楊思琦好貪心，得一想二！
為揀吳帥，當日楊思琦狠飛李泳豪。但想不到在分手一年後，她厚住面皮發兩個短訊給舊愛求翻撻。
鼎爺落閘
知道楊思琦以短訊翻兜泳豪，一直為子護航的鼎爺即時落閘，叫她唔好搞咁多嘢！
堅拒受氹
經過時間療情傷，及睇清舊愛為人，痴情漢李泳豪終於清醒，不為示愛短訊心動復合。
狠丟30袋「遺物」
上週六，楊思琦駕車離開寓所往尖沙咀，為撇記者在路上左穿右插，落車後又發晒老脾怒啤，與平日可愛無知的形象判若兩人，之後她上了一幢商業大廈，逗留近兩小時。
本週二是楊思琦34歲生日，早前返公司出席生日活動，唔知佢嘅生日願望係咪翻撻成功？
收到短訊後，李泳豪把楊思琦幾十袋「遺物」捐去寓所附近的石硤尾救世軍。
五月生日收短訊
李泳豪五月生日，楊思琦趁這段時間向豪仔翻兜示愛。
去年六月，楊思琦背男友劈腿，為吳帥珠胎暗結，被迫二選一，最終以一副無彎轉的態度，高調狠飛拍拖九年的李泳豪。
女都生埋，經手人吳帥卻不聞不問，楊思琦變單身母親，獨力背住養女重責，由美返港重新開始。殊不知，她竟暗地裡翻兜舊水泡李泳豪。
據知，兩個月前，楊思琦曾兩度向前度李泳豪發短訊，撩舊愛復合。
「豪仔五月生日，就喺嗰段時間楊思琦先後send咗兩個短訊俾佢，一個係『I love you』，之後一個係『I miss you』。唔知呢個女人想點，當日豪仔唔計較佢偷食，求佢復合，但楊思琦企硬，仲講到好似唔好阻佢發達咁！豪仔好辛苦先放得低呢段九年長嘅感情，而家佢仲搞呢啲咁嘅嘢！就因為楊思琦認為豪仔係可以任由佢擺布嘅人！豪仔家人同朋友都好擔心，大家都勸佢要清醒啲，唔好心軟。」知情者爆。
被楊思琦及新女Miki情傷後，李泳豪現只專心飄移事業。
楊思琦將自己看高一線，以為舊愛李泳豪會飛不出她的魔掌，會一撻即着。
但經歷過男人最痛的李泳豪，今次終於拒絕復合。
翻撻短訊撻唔着，反而迫使李泳豪下定決心，將拖拖拉拉的關係進一步撇清。
「豪仔起初唔敢同屋企人講，只係同身邊啲好朋友提過楊思琦send短訊俾佢嘅事，佢話今次真係死咗心，覆都無覆。分手成年，豪仔間屋一直仲放滿楊思琦唔要嘅衫褲雜物，唔捨得掉。但自從五月收到個女人嘅翻撻短訊，豪仔反而好似回魂咁，買咗三十幾個紅白藍膠袋返屋企，將楊思琦嘅嘢一袋袋送晒去救世軍，毫不留戀。」
楊思琦當李泳豪係救生圈的做法，其實早有前科。去年六月，她扑槌揀定吳帥，向外宣布與李泳豪分手後，也曾發「我仍很愛你，仍很掛念你」的短訊，氹住前度，鋪定後路。但經一事長一智，李泳豪今時不同往日。
對楊思琦發短訊翻撻一事，李泳豪有意維護對方，不肯說出真相，只不斷強調：「總之復合無可能，我放低晒！」
不過，一向直腸直肚的李泳豪老豆鼎爺，反應大不同。「我知有呢件事，我都好愕然，亦有勸豪仔叫佢做男人要灑脫啲，唔好對佢（楊思琦）有咩回應呀！人哋女都生埋，唔好諗！」
當日楊思琦急撇李泳豪無手軟，今日卻主動撩復合，鼎爺亦晒頭！
「我都唔明，究竟佢咩葫蘆賣咩藥？調轉係佢，個男人斷正傷透佢心，轉頭撩番你，你都唔再騷佢啦！咁點解佢仲夠膽send埋啲咁嘅短訊。（楊思琦對泳豪餘情未了？）多×餘！（擔唔擔心佢哋會復合？）God knows！對於佢我無嘢再講，早排奧運宣傳喺公司有見到楊思琦，真情假意都好，佢都主動叫聲我，我亦有同佢say hi，大家好嚟好去就算，希望佢唔好搞咁多嘢！」
與吳帥未甩
搞小動作想翻兜舊愛的同時，無綫內部卻傳出楊思琦跟吳帥未有真正分開。
據了解，吳帥因債務問題，一度跟當時身在美國的楊思琦鬧翻，但產女後已修好。至於拋妻棄女的「情節」，原來只是煙幕！
有指楊思琦在高層獻計下，以一個可憐單親媽媽身份搏同情，既可急救偷食加大話的插水形象，也有助刺激大眾同情心，搏有更多搵錢機會。
「吳帥周身屎，楊思琦知道黐住佢返出嚟，形象唔會討好。反而單親媽媽嘅可憐形象，可以幫佢事業反彈。高層仲勸佢等將來負面感覺凋淡晒，先公開番同吳帥關係。佢同吳帥依家多數會喺大陸見面，但一定好小心。」無綫內部工作人員爆料。
為搞噱頭，無綫搵楊思琦為奧運講跳水，食番佢同前香港跳水隊成員吳帥生女嘅新聞。
楊思琦返港復出，有高層樂易玲幫她鋪路，打救插水形象。
有傳楊思琦跟吳帥已關係復和，但她繼續以單親媽媽身份攞分。
搵銀撻Q
釣錯金龜的楊思琦，美國產女後宣布做單親媽咪，諗住扮可憐搏同情，可惜形象太負面，廣告客戶唔賣賬，奶粉、收身廣告統統接唔到，至今只有一個美容廣告在手；靠出席活動搵錢供樓養女，擔子不輕！
急搵奶粉錢，楊思琦生完女未收身，就兩度著泳衣示眾，其中一次為《五覺大戰》玩下水禮，引客找她拍收身廣告。
楊思琦形容現時約五個月大的女兒楊卓穎腳瓜粗粗，又鍾意jump，言下之意暗示她似足跳水爸爸吳帥。
女星生B後，例牌有美容院招手做收身代言，楊思琦產後未收身即以八萬身價急復出，可惜廣告商毫無反應，至今無收身廣告客敲門。
冇奶粉贊助
適值母親節時打親情牌，開到口不介意母女檔接廣告，公司亦刻意安排她做母親節騷主持，她亦在節目中哭謝母親，但一樣於事無補。
近期在無綫工作量略增，但真正賺錢的品牌活動，不見得比形象插水前多。
面懵心精
入行後，楊思琦有兩招殺手鐧，一係慳家，二係扮可憐；但卻多次被踢爆扮豬食老虎，令合作過的同事避得就避。
跟李泳豪拍拖一年多後，其時有報導指她購入的荔枝角400萬物業，是跟男友的新愛巢，收入、知名度不及女友的李泳豪，更被暗示食軟飯。楊思琦未有替男友澄清，之後再被踢爆一直住在石硤尾屋邨，荔枝角物業純粹是她投資保值用。
去年被踢偷食吳帥後，為保乖乖女形象，故意放風指李泳豪玩車大使，她負擔愈來愈重才提出分手。之後卻被影到佗住吳帥經手的BB，避走美國，才不得不承認有第三者。
出道即有機會拍住一姐佘詩曼及郭羨妮合作電視劇，開工期間愛做獨孤精的她經常扮俾人蝦，令報導一面倒指兩位阿姐玩新人。習慣扮可憐的楊思琦，多年來跟同劇演員冇兩句，亦麻煩多多，試過令跟她合作《鐵馬尋橋》的一班演員，群起杯葛。
