○一年組隊，○七年拆伙，Shine兩位成員徐天佑、黃又南，因為今年初獲邀出席黃偉文作品展，獻唱成名作《燕尾蝶》反應熱烈，兩個乘勢復合出新歌，上星期五（八月三日）開始，仲喺九展搞咗一連三場復活騷。
當年俾導演陳果發掘入行，天佑俾人話似郭富城，又南就似金城武，十年過後，翻版明星臉已經面目全非，反而為咗今次復合開騷，天佑一個月內極速減八磅谷八嚿腹肌，瘦到皮包骨終於變番郭富城；至於一向瘦骨仙嘅又南，早排被揭因為幫屋企人還債，搞到操勞過度响記者會暈低，今次開騷佢奉命狂食增肥，雖然似唔番金城武，但望落起碼似個人。
黃又南奉命增肥，練到少少胸肌，已經算係咁！
唱草蜢作品《失樂園》，Shine台上互摸，成為演唱會高潮之一。
Shine請嚟十年前同佢哋同期出道嘅Cookies做嘉賓，不過九餅唔齊腳，傅穎身在外地，而嫁人兼移民嘅蒲茜兒，亦因懷孕未能返港撐場。
