陳志雲入主商台做CEO唔夠半年，手執生殺大權的他，頻頻剷除異己。有指林曉峰早前「被離職」後，林海峰立即幫細佬搵志雲算賬，最後擘面收場。
其實林海峰和志雲不和，並非一朝一夕的事。據知向來識計數的志雲，有感商台DJ搵外快機會與日俱增，於是密謀成立經理人部門，DJ日後接job要抽佣俾公司，實行肥水不流別人田。一向多瓣數的林海峰，當然對這個抽佣制度深深不忿。據知他決定十月劈炮唔撈，以行動反志雲。
陳志雲這個新任商台行政總裁，除訂出一系列鐵腕政策外，更親自帶埋私人電腦開工，的確勞心勞力。
近年商台DJ撈過界，出書、演舞台劇、做電視主持等屢見不鮮。以往所有DJ接job，度期、傾合約等瑣碎事項，都由商台公關部義務一手辦理。除非活動由商台承辦，否則全份酬勞都由DJ袋袋平安。
年底推行新制
不過新任商台CEO陳志雲，認為這個做法有損公司利益，故部署成立一個經理人部門，主力幫DJ宣傳兼搵外快，並實行抽佣制度，希望從DJ的外快中分一杯羮。知情人士說：「陳生希望將電台DJ明星化，再吸納多啲年青人聽眾，所以就將無綫嗰種經理人制度搬去商台，亦即係話佣金全數俾公司，DJ的經理人冇得落袋，只係𢭃月薪。」
經理人制度由冇變有，陳志雲認為需要時間讓員工適應，所以現時他先在公關部加人手，新制度計劃年底推行。周二（7日），記者到過商台採訪陳志雲，他否認成立經理人部門，但就承認有請員工幫DJ接job，他說：「有好多嘢係要改，我哋暫時都冇一個正式經理人部門，不過公關部就真係請多咗兩個人，負責接洽工作。」
陳志雲積極在商台收納自己人，除邀請老死黎耀祥聲演《十八樓C座》（下圖），由他離開無綫前策劃的《盛女愛作戰》熱播，他立刻搵Mandy（左）和Bonnie開咪造勢。
講數不歡而散
突然改制抽佣，殺得一班有生財能力的DJ們措手不及。瓣數最多的林海峰，不忿辛苦錢無端白事被人剝削，曾試過就此事搵志雲理論。知情人士說：「阿Jan（林之洋名）呢幾年開嘅巡迴棟篤笑，商台有份主辦，所以有錢落袋，但商台仲要吼埋阿Jan嘅設計工作同廣告嗰瓣。阿Jan覺得商台的確係一個好好嘅平台去keep住人氣，但唔同意自己多年來付出努力，同合作夥伴打好關係，突然有人叉隻腳埋嚟抽水。所以佢有次做完節目後，就搵咗志雲傾偈。大家起初好和平去討論未來發展方向，但氣氛突然急轉直下，最後仲不歡而散。」
據知二人閉門會議中途，林海峰要了解細佬林曉峰「被離職」真相，但志雲竟然唔回應，令兩人關係更趨惡劣。知情人士說：「其實志雲早年涉貪出事，阿Jan喺節目多次暗寸志雲，搞到志雲心中有條刺，所以佢哋一直口和心不和。」對於他和林海峰的不和傳聞，陳志雲說：「最近有好多新聲音，我一直同阿Jan有傾有講㗎。阿Lo（林曉峰）之後都上嚟宣傳佢套新舞台劇喇！」
叫執包袱
林海峰和陳志雲一早有心病，今年3月，二人同場出席畫展時已鮮有交談，企到離行離列。當時林更當面揶揄志雲執包袱，他說：「唔知佢做到幾耐，可能佢都執包袱啦！」
早前林海峰出席活動時暗示唔撈，他說：「係人返工想收工，我想去應徵副局長。」據知他完成由商台主辦，和草蜢合作的演唱會後便辭職。
瓣瓣撈
45歲的林海峰，在商台開足24年咪，是商台中流砥柱，年薪水漲船高。不過錢冇人嫌多，所以他近年瓣瓣撈，豬籠入水。難怪他唔想有人抽佢水，寧願劈炮唔撈。
出碟開騷
歌藝一般的林海峰，至今已推出過29隻大碟。近年他發揚「邊唱邊噏」精神，搞《是但噏》棟篤笑騷亦四度添食。去年他簽埋東亞唱片，借林建岳財力大搞棟篤笑。
潮人自居
林海峰早年便試過跟攝影師合資開舖賣衫，近年他就主攻玩「crossover」，掛自己牌頭和不少國際品牌合作設計衫褲鞋襪。不過林的製成品經常被指抄襲。
創作總監
創作細胞滿瀉的林海峰，向來深受同行喜愛，獲不少藝人邀請擔任演唱會、唱片、MV等製作總監。去年古巨基為新碟拍封套，就搵來林海峰幫手教擺甫士，林又開多瓣搵錢。
DJ吸金榜
雖然近年商台收聽率下跌，但無損一班DJ的吸金力，暫時亦係林海峰最勁。
No.1林海峰1千萬
林海峰去年開始先後在香港、廣州等地搞《是但噏我好驚》巡迴talk騷，每場歌酬50萬，加埋其他設計酬勞，千萬走唔甩。
No.2森美500萬
森美除主持無綫綜藝節目，更以一集萬五元接拍25集無綫劇《法網狙擊》，而且他冧掂多個廣告商，頭半年已賺500萬。
No.3阮小儀300萬
昔日拍住森美的阮小儀，近年單飛賣笑有價有市，加上她以百萬酬勞代言美容產品，合共為她進賬300萬。
No.4少爺占200萬
少爺占今年一口氣開了三間潮店「MeeH」做老闆，加埋與拍檔Donald搞talk騷，頭半年已賺200萬。
No.5Donald120萬
Donald即將與少爺占舉辦六場《Ten Me Me》talk騷之外，更為不少動畫配音，就咁賺過百萬。
森美無奈撐
對於志雲的抽佣新制，森美說：「商台一向冇抽佣。不過抽佣都唔係壞事，安排我哋工作都落力啲。」「唔係壞事」四個字充滿無奈，老細要改，員工冇得say no。
阮小儀爆響口
阮小儀對抽佣新制冇意見，但就爆響口話林海峰經常話唔撈，她說：「哎！佢成日都係咁㗎喇！去啲function又問走得未，之後咪又係繼續on show，冇影響㗎喎！」
阿葛畫清界線
現時任一台DJ的葛民輝則指自己只是客席主持，他說：「成立經理人部門係好事，商台咁大招牌，傾job好啲。（林海峰辭職？）林海峰嘅嘢，你就問番佢。」
嘟嘟表現驚訝
鄭裕玲（嘟嘟）表示現時做客席DJ做得十分開心。提到林海峰劈炮，她表現驚訝，說：「應該唔會啩？佢都做咗好多年啦，係商台生招牌喎！」
林海峰認唔做
周三（8日），林海峰做完節目後趕收工，跑去停車場攞車速撇。其間記者問他劈炮一事，他笑笑口說：「係呀！我唔做喇！」
林：我唔做喇！
林海峰和彭羚結婚14年，二人育有兩女。林一早承諾孭起頭家，故一直反對彭羚出山。今次他離職商台，就要諗定後路養家。
抽佣新制，加上幫唔到細佬出頭，林海峰確實意興闌珊，待十月做完由商台主辦的演唱會後，就劈炮唔撈。近日林海峰無時無刻也將「唔撈」兩字掛在唇邊，DJ阮小儀亦表示見怪不怪，她說：「哎！佢（林海峰）成日都係咁㗎啦！去啲function都問走得未㗎啦！」而陳志雲對此則表現驚訝，他說：「佢（林海峰）冇同我講過喎！」
周三（8日），記者就十月劈炮一事問過林海峰，他說：「係呀！我唔做喇！我唔做幾日，出去做其他嘢！」俾人激親都仲識搞gag，看來林海峰唔做DJ，主力做棟篤笑，一樣長搵長有。
變陣拆局
陳志雲出任商台行政總裁後，隨即進行大改革，不少節目已作重新洗牌，DJ面臨隨時被換血命運，人心惶惶。
阿蘇頂阿Lo
林曉峰六月突然唔做，其主持的節目《大龍鳳》亦調去午夜時段。同時段則由冇做DJ多年的蘇施黃接手主持《大玩派》，主打消閒資訊。
In
out
盧覓雪代查小欣
查小欣主理的一台節目《巴巴閉邊個夠我查篤撐》，近年變成藝人的宣傳平台。志雲為了一洗頹風，計劃將《巴》節目押後至傍晚。而該時段將由盧覓雪坐正，以抵死手法道盡娛圈大小事。
In
out
志雲黨入侵
陳志雲亦安插不少迷雲黨成員攻入商台。近年主力出書的王貽興，上月就被委派逢周日主持二台節目《讀賣Sunday》。
據知迷雲黨最忠心成員王喜亦準備年底再開咪。
In
In
