貓砂種類愈出愈多，傳統凝結砂既單調又過時，邊似新興的水晶砂、木砂、紙砂、珠砂各有所長？貓砂的大趨勢是追求天然。
以下介紹四款新貓砂，均以植物或食材製造，全部沖得落馬桶之餘，就算愛貓不小心食落肚亦毋須擔心。
無論人定貓，去廁所，安全至上。★（五星最高）
小麥貓砂
評價：美國生產商聲稱百分百小麥製造，指天然酵素能中和異味。不過聞落似木糠，連上手質感都似，貓貓容易黐到成腳都係，濕水後變咗堆泥，難於剷起，好處是倒入馬桶好快分解到。
價錢：40L/$380（每磅$9.5）
香味：★
黏結度：★★
吸濕力：★★
易溶度：★★★★
（Swheat Scoop/ 2682 9247）
小麥貓砂顏色似朱古力麥片，拿上手多粉末，使用時要小心貓貓搞到周圍塵土飛揚。
一盤散沙，唔使多講都感受到吸水力有幾強。
粟米貓砂
評價：原材料來自粟米渣，特點是不易惹塵，少異味。但黏結度麻麻，吸濕力一般。要注意粟米質地在潮濕時易發霉生蟲，儲存期不可太長。
價錢：8L/$88（每磅$11）
香味：★★
黏結度：★★
吸濕力：★★
易溶度：★★★★
（天然植物貓砂/ 8206 3622）
粟米貓砂較粗身，雖香味淡，但除臭力不俗。
質感似木砂的粟米貓砂，濕水後又黏又實黐住盤底，難以剷起。
豆腐貓砂（最好）
評價：黏結度最勁，好易剷起，但沖落廁所時要注意分量，太多會難於分解。雙通心設計令吸濕力夠強，表面有大量細孔，助排走異味。唯一要注意是豆香味重，容易吸引貓貓吃掉。
價錢：7L/$95（每磅$13.5）
香味：★★★
黏結度：★★★★
吸濕力：★★★★
易溶度：★★★
（日本Mii雙通心豆腐砂/ 2662 5313）
形狀似孖條通心粉，比傳統的單條設計更堅固，不易散開。
長條形貓砂較寬，不易黏住貓貓手腳，免得撥沙時飛出盤外。
綠茶貓砂
評價：香味最濃，洗完手後仍有少許茶香。強烈綠茶味足以掩蓋寵物尿臭，而且綠茶成分有助殺菌，適合幼貓使用。缺點是價錢貴，一個月換一包，小數怕長計呀。
價錢：7L/$105（每磅$15）
香味：★★★★
黏結度：★★★
吸濕力：★★★
易溶度：★★★
（綠玉/ 3489 6275）
綠茶貓砂顏色深，就算有咩污糟一眼睇得出，打理方便。
濕水後易變鬆散，不過可沖落馬桶，勝在方便。
