《今日我至薑》
以為女神陳妍希嬌滴滴好冇膽就錯晒！前晚佢露出粗壯玉腿拍戲，俾人吊到兩層樓高，仲上上落落chok足10次都毫無怨言，真係好夠薑兼專業，抵讚。
《銅鑼灣》
憑台片《那些年，我們一起追的女孩》人氣急升嘅女神陳妍希，早排嚟咗香港，前晚九點幾妍希就為自己套新戲喺銅鑼灣開工，當晚妍希着住對四吋高嘅厚底鞋同熱褲，露出粗壯玉腿。劇組準備咗架吊臂車，冇耐就見女神由工作人員幫佢綁上威吔，然後將佢慢慢吊離地面，其間妍希仲笑笑口。當佢吊到差唔多兩層樓高時，導演就下令放威吔製造下墜效果，前後上落咗10次，好似玩跳樓機咁，個鏡頭拍咗10分鐘，之後補番一個妍希瞓街嘅鏡頭就收工。
陳妍希被吊到兩層樓咁高。
噚日陳妍希出席簽約儀式，佢話新公司贊成佢拍拖。
陳妍希前晚被吊上吊落成10次，睇見都戥佢辛苦。
另外，妍希決定加盟大國豐臣，佢噚日喺灣仔出席簽約儀式，高層張家振同何麗全等撐場，仲公佈會幫妍希出唱片，同度身籌備兩部大片。妍希又話公司贊成佢拍拖，但佢話家會以工作重。
