楊思琦昨日出席活動時，避談感情事，指會專心工作及家人。
前日34歲生日的單親媽媽楊思琦，被爆早前向舊愛李泳豪發出愛的短訊求復合，不過遭對方請食檸檬。思琦昨日出席活動全盤否認，有指她其實跟囡囡Krystal生父吳帥未完全掟煲，思琦避談感情，表示以家人為重。
楊思琦去年狠撇同居男友李泳豪，今年3月為前跳水運動員吳帥誕下囡囡Krystal，但卻發現男友是空心老倌，思琦即飛吳帥，獨力撫養女兒做未婚媽媽。
未甩吳帥舊愛豪仔兩個月前34歲生日，有指思琦先後傳I love you和Imiss you短訊求翻撻。同時亦有知情人士爆出思琦其實跟吳帥在產女後已經和好，當日復出宣佈當單親媽媽，希望博觀眾同情，增加工作量。
思琦昨日在尖沙嘴出席無綫宣傳活動，講到她向豪仔發求愛短訊，她說：「呢啲嘢已經唔關我事，我哋之前已經回應同交代過，又處理好晒，唔想再講，我都唔知邊啲係知情人士，佢知嘅嘢連我都唔知，真係唔係事實。」
有指她跟吳帥分手是煙幕，思琦說：「唔評論喇，大家都關心我嘅感情，呢一刻真係唔會再諗，感情隨緣。」
傳思琦翻撻泳豪，第一個跳出來反對的是李家鼎。
鼎爺抗拒鼎爺反對思琦再黐豪仔，是否因為思琦當日絕情表現？他昨日在電話中說：「你話呢？」鼎爺會否抗拒思琦買大送細？他說：「呢樣嘢唔好話唔介意，當日佢點對豪仔，大家有眼睇。」一向最緊張豪仔的孖生哥哥李泳漢昨日也說：「大家畀空間佢兩個，等佢哋各自過番自己生活，畢竟件事都咁耐。」
