楊思琦自爆女兒好鍾意jump，唔知係咪遺傳咗爸爸吳帥（小圖）嘅運動細胞呢？
楊思琦噚日同陳庭欣、劉江等等喺電視城參與「八月星辰」慶生，同前跳水隊名將吳帥分手後，今個月7號34歲生日嘅思琦，話今年有個女同自己一齊過已經好開心，但都希望身體健康、賺多啲、衰老速度減慢，為個女將來而努力工作。有冇迎接新戀情嘅準備？思琦話：「迎接咗寶寶，未有諗其他嘢。」
思琦誕下女兒楊卓穎後，努力搵奶粉錢。微博圖片
無綫噚日為一班八月生日嘅藝員喺電視城搞生日會。
情迷跳水賽事講到奧運，思琦透露最鍾意睇體操、游泳同跳水，佢仲好希望中國隊成功贏晒跳水金牌，唔知呢啲係咪情義結呢？佢仲話個女有運動細胞，睇乒乓波同羽毛球比賽睇到笑。
問到個女鍾唔鍾意游水？思琦話：「佢對腳仔又粗，好似摩打腳咁，撐到我個肚都穿埋，抱住佢，佢又鍾意jump。」囡囡咁鍾意跳似乎遺傳咗跳水細胞？思琦冇正面答，只係話：「佢係鍾意stand up、sit down。」
至於今個月27號25歲牛一嘅陳庭欣，未知到時點慶祝，因為前一晚係港姐決賽，但佢最希望儲到起碼50萬首期買樓同家人一齊住。
