終於打完風，大風大雨暫時告一段落，心郁郁想衝去沙灘同陽光玩遊戲。難得着起比堅尼狂曬，之不過拎到左一部相機、右一部手機成個宅女一樣，真係乜霸氣都冇！以往想要部防水兼影相靚嘅手機，只得日系水貨機。家終於有日本品牌Sony幫手，喺香港出番部有齊呢兩大強項嘅行貨機Xperia acro S，絕對係夏日福音。唔使再拎住個老土防水袋曬太陽，遮住心口事業線咁煞風景啦！
Spec.
作業系統：Android 4.0
處理器：1.5GHz雙核心、1GB RAM
制式：3.5G、GSM四頻
屏幕：4.3"1,280×720
鏡頭：1,200萬像素
記憶：內置16GB、最高支援32GB microSD
體積：126×66×11.9mm
重量：147g
售價：＄4,598
查詢：Sony（8203 8863）
攝力到point
Sony易名後嘅Xperia S大賣，所以今次新手機雖然喺日本叫Xperia acro HD，但嚟到香港都想食住個「S」勢，改叫acro S，更提醒粉絲攝力一樣咁勁。實試表現，1,200萬像素未有叫人失望，對焦快之餘又易營造淺景深，最抵讚係保留番個實體快門掣，方便落水影。再load番張相睇，4.3吋高清芒夠晒靚，加埋等到頸長嘅Android 4.0，睇相更爽。最驚喜係睇相介面新加地圖選項，只要影相前開咗地理標籤，一click個地圖掣就可以睇番張相喺邊影，去完沙灘影相，就知道係香港邊個point喇！
試相
室內環境影細細隻嘅鬆弛熊，雜訊唔嚴重，營造到淺景深之餘，細緻到連公仔上嘅毛毛都睇到，讚！
一按功能捷鍵就可以睇晒相機所有設定，唔使再左拉右拉，搵到煩！
入相簿睇相，全部圖片依日期排列，夠晒方便，畫面上方仲新加入「地圖」介面。
按入地圖介面，以微型相片喺地圖上標示番拍攝位置，唔似一般相機要傳返電腦再用Picasa睇地圖資訊咁複雜！
保留實體快門掣，雖然細粒唔太好㩒，但勝在落水後，唔使狂篤芒先影到相。
日系味防水
跟機送充電座，極有日系機味，仲可以將手機打直放起，充電途中，篤芒一樣方便。
話晒都係日本品牌，Sony設計嘅手機外形一向都受香港fans歡迎。就算呢部Xperia acro S主打防水，睇落亦完全冇一般戶外機嘅hard core味。而且新機今次仲跟埋個充電座，睇落極富日系味。外形滿分，防水表現亦達IP7，即可於1米水深正常操作達30分鐘。而防塵亦達IP5，除非沙灘嘅沙幼過灰塵，否則都難以入機，百分百係沙灘良伴。
實試防水
拍攝時，攝影師全方位不斷狂噴水。之後打開microSD咭位睇，乾爽依舊，玄機係咭糟上嘅超迷你防水膠。
機頂有HDMI、miniUSB同3.5mm插頭，全部都有防水蓋，加埋呢個鏡面設計，又靚又實用。
機底特設手機繩位，雖然好old school，不過勝在去到沙灘可以駁條頸繩周圍跑，夠晒細心。
玩後感：再薄更好
以4.3吋屏幕機種嚟講11.9mm真係幾厚，同樣大芒嘅舊機GALAXY SII都只厚8.49mm
家部部新手機唔係有4G就係4核，呢部Xperia acro S兩樣都冇，似乎有少許失色。不過玩落反應都算快，加上攝影功能唔弱。至難得係防水手機終於有靚仔look，拎去沙灘唔失禮。加埋內置16GB，仲可以插咭，狂影都唔怕冇晒memory。唯一要彈係機身略厚，拎上手頗笨重。
