吳雨霏由豬膽鼻執到間尺鼻、黃婉曼由包包面變V煞，連台灣靚女林志玲都話執到似蠟像人，不過點整都唔夠日本是非女王澤尻英龍華咁誇張。
澤尻於新戲《整容天后》中，飾演一名除性器官外，全身都整過容嘅人氣偶像。《整》片唔只整容橋段具話題性，內容更涉及仰藥，兼且勁多性愛場面，而澤尻甚至有露點鏡頭，一鋪過搏到咁盡，好在今次算翻到身，如果唔係下次要拍AV先掂喎！
《整容天后》上映日期：9月20日
雖改篇自漫畫的《整容天后》，是澤尻英龍華霉足5年後，復出影壇的頭炮，此片將於9月在香港上畫，但早於7月14日已在日本登場，上映至今，票房已衝破10億日圓（約1億港元），澤尻終於唔使孭住票房毒藥個臭名。
O嘴肉搏
戲中，澤尻為爭片約，不惜同飾演製片人嘅哀川翔上床，呢幕床戲見到澤尻O晒嘴嘅表情，就知佢好投入。
仰藥止痛~因為整容後遺症搞到全身劇痛，試過連止痛藥都止唔到痛，要食迷幻藥來分散注意力，最後搞到神經錯亂。
整容過龍
因為整容整過龍，澤尻定期要去整形中心，將眼、耳、口、鼻以及全身執番靚，誇張過MJ。
性愛兼仰藥
《整》片收得，全靠套戲內容夠踩界。講澤尻飾演嘅女主角Ririko，是個在夜店工作嘅豬扒，但經全身整形後，竟成為人氣model更風靡全日本，不過整容整過龍，出現後遺症，Ririko唔只要飽受整容後身心痛楚嘅煎熬，仲要面對由水原希子飾演嘅新紮模爭job嘅壓力，卒之搞到精神崩潰。戲中澤尻唔只上演多場性愛場面，仲靠仰藥嚟麻醉自己，總之係澤尻從影以嚟最大膽一次。
澤尻：做番自己
《整》片由日本名攝影師蜷川實花操刀執導，今次揀澤尻孭飛做女主角，據知主要原因係蜷川大師覺得澤尻有經歷，事業曾試過跌到谷底，相信她能演繹出主角Ririko面對事業低潮嘅感覺，最重要是她肯豁出去作裸露演出，所以澤尻是她第一人選。最近澤尻於訪問中自爆：「最初收到劇本時，同朋友商量過，佢哋叫我辭演，但我覺得我同戲中Ririko好相似，我哋好似係同一個人一樣，呢啲可能係緣分，所以我一口答應接拍。」咁又係，澤尻同Ririko一樣負面新聞一籮籮，做番自己簡直係easy job啦！
一向是非多嘅澤尻，早前於電影宣傳期間，被踢爆隊草，又話患抑鬱，多次缺席電影宣傳活動，7月14日終於現身首映禮，換上一頭金毛短髮嘅佢，當日個樣似咗何超雲。
醜女又翻身
06年憑韓片《醜女大翻身》攞影后嘅金亞中，戲裏面講佢整容後由豬扒變索女，現實中原來一樣。早前網上流出金亞中疑似隆胸嘅照片，事後當然唔認，不過唔好理佢整過定冇整，金亞中沉咗幾年後，最近翻身，闖強國拍大陸戲《神奇》，據知佢仲拍住靚仔黄曉明一齊做，勁威。
隆胸照流出
早前網上流傳疑似金亞中隆胸前所拍嘅照片，當時金亞中樣貌豬扒，胸部扁平，邊有𠵱家嘅金亞中（小圖）咁索。
06年金亞中憑《醜女大翻身》一片大收，攞咗「大鐘電影節」等3個影后獎，之後一直冇代表作。
