高海寧做草蜢節目嘉賓，由頸封到落腳，令不少人大失所望。
上星期三（七月十八日），草蜢主持嘅《環遊世界明星賽》喺電視城錄映，兩男兩女嘉賓有張衞健、梁漢文、阮小儀同高海寧。
見到咪神榜上有名，《壹》仔雙眼為之一振，馬上請纓入電視城。點知高Ling不從人願，當晚長裙由頸冚到落腳，雖然薄料之下，巨胸依然浮凸，但唔痕唔痛，令人氣餒。
點解會咁？二五話高Ling今個書展出自傳《寧•密語》，要收起心口做才女，避免同班肉模混埋一齊，令人錯覺以為佢出賣肉寫真。
高Ling一番苦心，但八珍支持《壹》仔，都係嗰句，好嘢唔好收埋。
面對高度同心口都勁人一等嘅高海寧，阮小儀即使有梁炳幫手凌空挺起，都係冇乜用，兩個玩完辛苦到坐埋一邊搓手，得不償失。
上星期五，出席《法網狙擊》飯局，高海寧帶埋新出自傳，簽名送俾陳敏之同謝天華。
