花心的黃宗澤上周到嘉玲在上海開設的酒吧喪蒲。
黃宗澤日前回港工作，據聞他昨晚離港返內地開工，對於分手，昨日他接受商台電話訪問說：「我哋一齊咁耐，分開冇可能會開心，一定會唔開心。我都想喺番埋一齊，但唔得就唔得，感覺冇咗就冇咗，呢個決定係雙方和平下嘅共識。」他否認事件涉第三者，他說：「呢啲係兩個人嘅事，唔關第三者，我唔怕人哋抹黑我，習慣咗，呢啲嘢男仔食得起，人哋點寫冇所謂，有乜嘢就搞我啦！」
黃宗澤承認曾認定杏兒是結婚對象，問他會否重新追求杏兒？他說：「睇緣份啦，呢啲冇得強求同勉強，緣份係天畀，如果大家覺得緣盡都冇辦法，我可以做嘅都做咗。」他承認自杏兒成為視后，雙方已出現問題，他苦笑說：「或者我真係好難頂，可能性格問題，我唔識同人分享心事，變咗唔係好溝通，連同媽咪都好少講。」他再三強調：「我哋唔係仇人，縱使分開咗都係朋友，佢絕對係好女仔。」
「女仔只係助手」身為兩人經理人的樂易玲，擺明重男不重女，昨日她接受商台訪問力撐負心黃宗澤說：「我噚晚同黃宗澤傾到四點幾，佢講到喊，詳情唔方便講，佢過緊最難過嘅階段。」黃宗澤是否花心？她說：「咸豐年前嘅嘢唔知，但家肯定唔係咁嘅人，如果真係有第三者，一早俾人影咗，佢一直想同杏兒開花結果，嗰幾個女仔只係佢助手，係我哋幫佢搵。」她續說：「我諗佢捱得住，佢話覺得自己可以，仲話要傷就傷佢，唔想傷害杏兒，如果傷到杏兒佢寧願死，我都有叫佢追番佢，佢話你都知你個女幾硬頸，唔係話追就追，話要做番啲嘢證明畀杏兒睇。」
