被傳係未減肥前嘅龍小菌（左），曾經同謝安琪及鄧小巧合照。
網絡蒙面歌手龍小菌身份一直成謎，佢自稱係熱愛唱歌嘅中學教師，但因為體型肥胖，又唔想出騷唱歌而搞到冇咗飯碗，所以每次出現都由頭包到落腳。
網上流傳龍小菌的真身，其實一啲都唔肥。
龍小菌聲稱蒙面係因為「又肥又醜」，但有網民質疑佢只係博出位。
曾參加歌唱比賽高登討論區之前已經有人將懷疑龍小菌起底，指佢真名叫蔡小茵，喺一間教會中學教中文，09年曾參加咗一個叫「星投大戰2.0」嘅歌唱比賽，當時佢着住短裙演唱謝安琪嘅《我歌故我在》，其實唔算特別肥，網上亦流傳一張佢同謝安琪同埋鄧小巧嘅合照，相信係當時影低留念。
之前龍小菌話6月已辭職，全心投入歌唱事業，但噚日有讀者踢爆佢其實3月已經辭職，又話佢只係一個新老師，並唔係好似龍小菌講嘅教咗三年書。佢仲被爆話其實以前根本唔介意自己肥，仲唔覺得自己唔靚，實情係好有自信。其實龍小菌嘅造型已經引嚟兩極反應，有網民對佢好支持，但亦有好多人質疑佢包到實好似紙紮公仔，加上佢真身根本唔係肥，質疑佢只係玩噱頭借高登上位。
