上個星期五(13日)晚，黃貫中喺紅館舉行一連兩場《Rockestra演唱會》本來好開心，但因為少少事而大動肝火！
阿Paul喺慶功宴咆哮：「我用咗6年時間籌備個唱，手指都彈到爛晒，但報道仲細過部iPhone，有傳媒冇嚟就亂寫個騷得七成入座率……」記者解釋首場只會報道頭15分鐘，之後兩日會有更大篇幅報道，點知佢竟然發晦氣：「就當我誤會，我正衰人，正仆*！出街俾車撞死……」唉，公道自在人心，其實使乜咁勞氣呀？學佢女友朱茵就啱喇。朱茵因為大肚冇現身捧場，不過佢睇完首場報道後，即刻喺微博留言力撐，仲上載一張九成入座率嘅相。有女友遙距支持，阿Paul條氣順番晒啦！
Baby，唔使嬲，我同你出頭。﹙設計對白﹚
阿Paul因為報道佢演唱會入座率低兼且篇幅細，喺微博鬧爆個別傳媒
朱茵雖冇出席男友演唱會，但亦透過微博大讚演唱會good show。佢仲上載一張入座率達九成嘅相，遙距支持男友。
