林欣彤（Mag）出道兩年，有娘家TVB同唱片公司英皇力捧，keep住有碟出有戲拍，比起同屆《巨聲》幫，際遇好唔知幾多倍！貴為小巨肺，Mag有得孖住天后容祖兒拍《Diva華麗之後》，戲分僅次於同門師姐。
戲中做番樂壇新人的Mag，同陳家樂有幾場親熱戲，其中一幕喺馬路中心激咀，又着住超薄白背心同家樂仔攬攬錫錫。得5呎1嘅佢啱啱去到家樂仔膊頭，更胸壓對方條腰送波餅，鬼咁纏綿，不過Mag同FBI講佢一啲都唔尷尬，「其實間房同我自己間睡房好似，只係多咗個男仔啫！」
而家同男友羅孝勇同居的Mag，當然唔慣帶其他男仔返屋企啦，想死咩！
險姦
除咗小背心上陣，Mag喺戲中仲有場險被強姦戲分，不過話晒係純女形象，最後梗係冇蝕底畀人啦！
激咀
要趷高腳先錫到嘅林欣彤，同陳家樂咀到面都凹埋，齋睇相都戥佢哋肉緊！
雖然同家樂仔有床戲，但Mag話兩人溫馨多過激情，叫粉絲唔好咁大期望。
Mag喺戲入面原本唱酒吧同商場騷，後來俾經理人杜汶澤睇中簽做歌手，同現實生活都幾似。
