劉嘉玲笑言要向劉德華（小圖）睇齊，請四個保鑣傍身。
劉嘉玲前晚透視出席品牌活動，提到內地治安不靖，嘉玲指要請四個保鑣護身，向劉德華睇齊，更爆劉德華曾被fans匿床底嚇親，瞓覺也要保鑣望住。超雲、陳山聰被指紋愛的紋身，舊愛王大業就寸爆指似蠱惑仔、黑社會的「龍虎」味，行為太幼稚。
劉嘉玲、郭富城、馬詩慧、大生銀行馬清偉女友Winnie及女兒等，前晚在尖沙嘴出席Gucci展覽，劉嘉玲一身透視印花裙，高貴性感，她繼續大談生意經，表示夜店若在香港開分店，要深思熟慮才可以，她又表示想投資搞製作：「拍片就未諗到咁成熟，會想做製作，施南生係我榜樣，我仲爭啲人生經驗。」
嘉玲現場一時興起做女工，和Gucci高層一齊擦皮鞋。
橫店品流複雜提到橫店之前爆出女臨記被姦殺案，嘉玲說：「嗰面啲人四方八面咁嚟，係雜啲。」嘉玲更大爆劉德華保安程度嚴密，瞓覺時要安排保鑣坐在床邊梳化，望住才瞓，嘉玲說：「我要同劉華睇齊，學佢請四個保鑣，佢話曾經有fans匿喺酒店房床下底，我都唔驚鬼，係驚人，我遇到嘅話，真係靈魂都飛！」
王大業寸山聰賭王女兒何超雲和陳山聰被發現遊泰慶祝拍拖周年紀念，超雲前男友王大業前晚說：「咁開心？」覺得超雲泳裝身材如何？他說：「好少留意佢身材喎，同以前差唔多，肥咗少少啦。」有指陳山聰為冧超雲，在小腿紋女友英文名的字首「F」字紋身，問他當年有沒有計劃紋愛的紋身？王大業即寸爆：「咁龍虎，唔啱我喎，我成熟唔搞呢啲喎。」記者問他所講「龍虎」是否代表蠱惑仔、黑社會feel，他則藐爆說：「咁上下啦！」
此外，超雲昨日在微博沒開名暗寸王大業博宣傳：「吃不到的葡萄我知道有點酸，可真不需要把自己的小器建築在說三道四上。」更直斥他舉動小家、無修養，叫對方管好嘴巴，更暗示他身邊有壞朋友。
