栢芝同霆鋒（小圖）離婚後獨力照顧兩子，日前栢芝就同Lucas、Quintus買玩具。
張栢芝上年同謝霆鋒離婚，栢芝負責照顧一對囝囝Lucas同Quintus。呢排天氣時晴時雨，小朋友好容易感冒，據知Lucas同Quintus輪住病，Quintus上個禮拜仲發燒要入養和留院，栢芝就要兩邊走照顧兩個仔，霆鋒日前亦漏夜去探Quintus。一直有傳栢芝恨同霆鋒復合，佢見霆鋒去醫院，就即刻係咁叫霆鋒做老公。其實佢哋都離咗婚就嚟一年，栢芝仲唔肯改口，明顯好恨箍煲。雖然栢芝成日死口話唔會復合，不過都係口硬心軟。
日前又有人將栢芝戴住口罩同兩個仔喺金鐘買玩具嘅相放喺微博，栢芝經理人Emily馬上轉發，仲擦鞋大讚栢芝：「帶孩子真不容易，佩服、佩服。」
柏文被指未搞好離婚手續就同Jeana拍拖。
謝婷婷不時將姪仔Lucas同Quintus嘅得意相上載Instagram。
Jeana疑陷三角戀失婚栢芝復出票房仆直，佢呢排冇工開做番好媽媽湊仔，佢細佬張柏文就媾掂D奶模Jeana，佢哋一拍即合，仲玩埋同居。Jeana同柏文啱啱公開承認戀情，即有人報料話柏文結過婚，同前妻未搞好離婚就媾Jeana，三角關係亂到爆。柏文噚日解釋話：「黐線，我以前幫婚紗公司做過代言人，坊間就誤會我結咗婚，我三年前同另一個女仔拍拖，佢媽咪都問過我，最後我為證明單身，仲專登去攞寡佬證。」
