無綫新劇《回到三國》上個禮拜四（五日）舉行宣傳活動谷劇，身為女主角嘅楊怡，一嚟到就俾記者追問有關佢同羅仲謙同居將軍澳嘅事，當事人亦早有預備：「我同我媽咪同居咗好多年先真，唔好咁膚淺啦！（但影到謙仔出入你屋企樓下大堂喎！）先排同謙仔食飯，佢有提過想搬入將軍澳，（搬近你方便拍拖？）係方便返工，好多人都住將軍澳架啦！」
問題係《壹》仔當日半夜點幾鐘影到羅仲謙上楊怡屋企，直到第二日下晝先行去停車場攞車返電視台，睇樓冇可能半夜三更，甚至由半夜睇到第二日，你都咪咁膚淺啦楊小姐！
個鼻比起高峰時期稍為回落嘅楊怡，話自己呢排拍緊《法網追擊》，之後又要開《仁心解碼2》，開到口想放假，記者問佢係咪想有時間拍拖？楊怡口快快答：「都要有時間先得架！」衰咗！
無綫冇得播奧運，林峯孭飛嘅新劇《回到三國》，將會聯同鄭嘉穎主演嘅《怒火街頭2》，一齊對戰體壇盛事。
