經過真人版「醜女大翻身」，變身為台灣「宅男女神」嘅安心亞，最叻喺幕前扮cutie，但私底下唔單止一啲都唔可愛，揸車仲可以用個「狠」字嚟形容。
安心亞落咗通告，邊行邊玩電話。誰不知一開車，半粒鐘內連環瀨嘢，認真攞膽。台灣《蘋果日報》圖片
話說上星期一（25號），佢喺電視台做完節目後，揸住港幣37萬嘅MINI COOPER，經過松山路時，竟然半粒鐘連環違例三次，包括轉線唔打燈、衝紅燈及cut雙白線等。咁搞法，當然逃唔過警察法眼啦！難為佢俾警察截停後，又想使出撒手鐧，對住警察嘟嘴扮無辜。可惜吖，呢位警察哥哥唔係宅男，罰單照派，仲要係逐瓣同佢計，總之三樣危駕夾埋共罰港幣9,000蚊。
真係瘀爆。
轉線唔打燈$1,800
衝燈$5,400
Cut雙白線$1,800
人家不熟路嘛！（設計對白）
最後俾警察哥哥攔截，即時托腮O嘴擺出一副無辜樣。唉，犯規就係犯規，扮咩嘢呢？
扮可愛呢家嘢，唔係人人受㗎。
