近年香港模夢想攻日，繼先鋒Angelababy、Janice Man同周秀娜後，最近輪到娜姐師妹葉熙祺（Anna Kay）延續模攻日夢。
啱啱25歲、來自廣州的葉熙祺，年頭已孖住黎明嫂樂基兒拍資生堂的《TSUBAKI》洗頭水廣告開拓日本市場。最近再升呢，被日本OL潮誌《Can Cam》邀請成為「專屬」模，更於最新一期7月號《Can Cam》登上封面。稍後葉熙祺更會接拍日劇同電影，雖然暫時得個「講」字，但Anna勝在五官標致兼個樣夠自然唔似整容，要成為「黑船」俘虜㗎仔，大好前途。
葉熙祺被《Can Cam》睇起任專屬模，於最新7月號當上封面女郎，連日本娛樂新聞報紙《日刊Sports》都以大篇幅報道
葉熙祺雖然只得5呎4吋半，唔算高，亦冇大胸，但勝在樣夠sweet，而《Can Cam》方面就讚佢笑容自然得嚟好可愛，一定受日本人歡迎咁話。為隆重其事，雜誌仲搵埋步姐御用攝影師下村一喜操刀幫佢影相。
眼大大笑起上嚟cute爆的葉熙祺，自上年尾孖住日本名模蛯原友里演出《TSUBAKI》洗頭水廣告後，即開行turbo攻日，除早前行過《Tokyo Runway》模特兒騷外，最威係連日本OL潮誌《Can Cam》於最新一期7月號宣布正式邀請她成為《Can Cam》首位中國籍「專屬」模。
封面女郎
7月號《Can Cam》用咗12版篇幅去介紹葉熙祺，簡直係華人之光。而佢香港嘅經理人Roy就話Anna Kay同《Can Cam》嘅合作暫定一年，如果雙方合作愉快，當然會繼續。
《Can Cam》讚似小動物
於7月號《Can Cam》內，葉熙祺唔只成個大頭做封面，書內更有連續12版介紹佢，當中以葉熙祺的8個秘密做主題，介紹佢聽嘅音樂，甚至食嘢嘅口味等，而她當然唔少得示範時裝。葉熙祺之所以被《Can Cam》睇起，該雜誌的形象設計師小山田對佢身形讚不絕口，乜嘢衫都carry到，而最重要係編輯堀由佳喪讚：「初頭睇Anna啲相，淨覺得佢得個樣靚，但見到真人感覺完全唔同，無論佢嘅舉止同談吐都好似啲小動物咁，好kawaii，好吸引到身邊人嘅目光，呢類model日本人一定buy。」
唔好睇葉熙祺身形咁纖瘦，《Can Cam》爆佢其中一個秘密就係好大食，而且最鍾意食甜品，尤其忌廉泡芙，佢仲晒命話：「好彩我係食極都唔肥嘅人。」真係羨慕死㗎妹同港女
葉熙祺喺日本仲係新人，佢嘅日文翻譯就爆佢初到達東京成田機場時，已第一時間走去買飲品招呼工作人員，細心得嚟好識做。
年頭出處女國語大碟《祺待》嘅葉熙祺，〈斷翼天使〉曾攞過中央電視台舉辦嘅《中國網絡頒獎禮》嘅「最佳MV獎」。唔只睇得仲唱得
葉熙祺攻日首個任務，就係同班名模（左起）水原希子、AKB48成員小嶋陽菜、蛯原友里、樂基兒及俄羅斯top模Sasha Pivovarova一齊幫資生堂嘅《TSUBAKI》洗頭水賣廣告，拍埋班名模身邊，絕對唔輸蝕。
望出日文碟
最近葉熙祺（右）已加盟日本Pearl Models經理人公司做蛯原友里師妹，葉熙祺話友里介紹好多朋友畀佢識，得閒仲會交換扮靚心得，對佢好關照。
今年全力攻日的葉熙祺，其實年頭已與盛產名模嘅Pearl Models簽咗3年合約做蛯原友里師妹，據知Anna除幫《Can Cam》做御用模，最近正接洽多部中、日合資的電視劇及電影，還有電視廣告。而本身居於北京的Anna每個月都要飛去日本開工，每次只逗留10日。雖然辛苦，但Anna就話：「去親日本做嘢，每次只瞓得兩個鐘，但好開心，日本公司好有制度。我
