電視大戰，令三哥（苗僑偉）成為王維基及TVB爭奪對象。事業順境，剛拍畢《雷霆掃毒》的三哥慶祝54歲生日亦好疏爽。早在一個月前，已安排兩日一夜澳門之旅，邀請了十多位明星老友到賀，更豪使30萬，包食住兼唱K玩天光。
生日前一天（6月17日），三哥與家人先到澳門食飯慶祝，凌晨時分，三哥更孖住吳啟華殺入賭場，賭到清晨四點幾至走。凌晨賭戰失利，卻無損三哥雅興，翌日（18日）十多位明星老友殺到賀壽，與三哥唱K唱通頂。連玩兩晚通宵，三哥精力十足。
17/6肉緊甩牌
17日深夜，吳啟華陪三哥到賭場玩百家樂。三哥手風不順時，肉緊地甩牌。
上周一（18日）乃三哥54歲生日，當日黃昏時分，三哥好友黃日華、張兆輝、謝天華、洪天明、王浩信同林子善等，一行十多人雲集港澳碼頭，乘坐三哥安排的五架豪華Van到達永利酒店。原來三哥當晚在永利宴會廳擺八圍賀壽，飯後再到澳門銀河內的「美麗世界」唱K。
「今次三哥真係招呼周到，壽宴嗰晚鮑蔘翅肚唔在講，仲包埋大家喺酒店嘅住宿，而且間間都係靚房。三哥喺壽宴叫咗八、九支靚紅酒，而且好快俾班老友隊到貓貓哋，之後落卡拉OK又劈過。三哥不斷向人敬酒、猜枚，搞到識飲嗰班都冧晒。不過謝天華好嘢呀，佢不但冇醉，仲同老婆落賭場玩多兩手至上房。」知情者說。
黃日華當晚住的酒店房有大浴池、大梳化，咁好環境，華哥都忍唔住擺上網晒命。
扯煙提神
擔番支煙提神，係賭仔指定動作，三哥都唔例外。
啟華放蚊
好辛苦至贏到一鋪，三哥即時笑番，不過做陪客嘅吳啟華就冇咁好精力，頻頻放蚊。
6月17日，苗彤和母親戚美珍齊齊陪三哥預先過澳門，一家人慶祝父親節及三哥生日。
30萬全包宴
船票（30人來回）：2萬
接送Van（5架車包兩日）：5萬
酒店：悅榕庄（10間套房）3萬
大倉酒店（10間套房）1萬8千
壽宴（8圍）：16萬4千
卡拉OK：1萬3千
翌日午餐：5千
合共：30萬
兩度殺入賭場
三哥今勻可謂盡興而歸。早一晚（17日）已經同太太戚美珍及女兒苗彤先行抵達澳門晚膳，慶祝父親節及預祝生日。及後三哥一家會合多位圈外好友到銀河內的賭場賭番兩手，逗留咗一小時，三哥贏咗三萬多元。
三哥和好友在悅榕庄倒數生日後，於凌晨零時30分再度殺入賭場，會合剛由內地趕來的吳啟華。齊齊走到一張最低投注為一千元的百家樂枱。三哥換了一萬元的籌碼作賭本，吳啟華及一名男友人就充當軍師。三哥埋枱看了電腦所顯示的紀錄後，就立即落注兩鋪一千元買「閒」。
最初「壽星公」都有少少斬獲，但過了一小時後，三哥運氣開始減弱。連輸三鋪後，他有點煩躁，點起香煙再用力甩牌，肉緊地叫：「吹！吹……」，不過手風唔多順。之後他與吳啟華咬耳仔後，便轉枱再賭。凌晨四時許，運氣仍然欠佳的三哥，最終見輸剩三千蚊籌碼，終於換cash返房休息。
最後埋單，三哥都贏咗二萬幾，不過相對佢開P花的30萬元，真係濕濕碎！
18/6三哥帶隊
18日晚上6時多，謝天華及黃日華到達澳門碼頭，在三哥專車接送下，眾人去到永利晚宴。
群星轉場
晚上十一時許，三哥帶眾人到銀河「美麗世界」唱K。另一批星則先上酒店房，半小時後才到。
美女賭神
洪天明夫婦、黎瑞恩、戴夢夢經過賭場，小恩子玩咗兩手，可惜都要損手離場。
Laughing自唱
上去K房，眾星自然大展歌喉，金剛、謝天華更唱番自己的演唱會MV，十分搞笑。
