外間唔少人一路都覺得純官鄭家純係「二世祖」，擔心周大福珠寶（1929）由佢坐正揸旗會唔穩陣，不過小琴就覺得未必，皆因原來純官講價技巧唔錯，好似周大福今年上市，投行承銷基本佣金竟然係全城最低嘅1.5%，睇返上年農行（1288）上市佣金得1.98%，一班「唉賓架（i-banker）」已經嘈到拆天，但今次就全部毫無怨言，你話佢講價係咪有一手呢！
小琴無細心統計過，不過睇返近期招緊股嘅一批新股，如果唔計公司按表現發放嘅獎金部分，佣金最低嘅新華人壽（1336），但都要2.5%。周大福比新華人壽更慳家，佣金得1.5%，加埋獎金最多都係2.25%，假設用上限21蚊定價，投行一齊分享佣金約莫5億左右。
難得一班賓架全無怨言
有間中資投行嘅高層同小琴講，除咗國企一般佣金都係2.5%之外，新股承銷佣金一般同集資額掛鈎，集資愈大佣金比例可以愈低，好似早排小小超隻電訊信託（6823）都係得3.5%，不過好似周大福咁低，佢話佢敢講係絕無僅有喎。
上年農行打破慣例，將佣金壓到1.98%，搞到一班唉賓架好唔高興，但今次大家就粒聲唔出，有老友講，純官今次要靠周大福大打翻身戰，梗係樣樣鏈到盡，加上佢老人家仲有咁多生意畀大家，好似今次保薦人之一嘅滙豐，早排就幫手搞埋新世界（0017）同新中（0917）個供股，咁就梗係樂意計平啲啦！
如果您喜歡這篇文章，請按「讚」或分享給您的朋友，以示鼓勵。
