《男人之苦》：『有飯食之餘又有雞脾食』

個案一：(租人樓，不論乜樓)

女朋友帶你返屋企食飯，伯母問你住邊。

「我租人樓架…響深水埗呀…不過啲租都好貴下業主又想加租…冇辦法啦想同佢過二人世界…大家辛苦啲…」

此時，伯母會話：「我有啲唔舒服要入房先，你自便啦。」你就同女朋友大家眼望望，最終不歡而散。

個案二：(租公屋)

女朋友帶你返屋企食飯，伯母問你住邊。

「我住公屋架…天水圍天耀村呀…不過就租…早年走寶冇買到，好後悔…」

呢成餐飯，你會有飯食，可能又有肉食下，不過成餐飯伯母唔會再有野問…話之你乜大學畢業…食完飯，伯母會大聲叫：「女！送客！」

個案三：(自置公屋)
女朋友帶你返屋企食飯，伯母問你住邊。

「我住公屋架…天水圍天耀村呀…不過就買…早年老豆老母買落…都叫自己物業…算係咁啦…」

呢餐飯，你會好開心，你會有飯食之餘又有雞胸食。伯母又會好欣賞你父母當年既決定，而且話題非常之廣…有講有笑。因為有樓…而且樓價升…話之你乜嘢大學畢業。食完飯，伯母仲會問你食唔食生果，走時仲會點點頭…

個案四：(自置居屋)

女朋友帶你返屋企食飯，伯母問你住邊。

「我住居屋架…600呎到啦…早年老豆老母買落…叫自己物業咯…算係咁啦…好過住公屋…好過租人樓…遲啲一定會換私樓…」

外母會話你有志氣又叻仔，因為你已有物業，唔係亂吹噓，能換到私樓既機會係有。

呢餐飯，你會好開心，你會有飯食之餘又有魚食…大家會有講有笑…走時外母會問你點解坐多陣…

個案五：(私樓，老豆老母買落)

女朋友帶你返屋企食飯，伯母問你住邊。

「我住私樓架…雖然響將軍澳…早年老豆老母買落…不過已經供完係自己物業…」

成餐飯，會好開心，好温韾，你會好似多左個老母咁。伯母又會好欣賞你父母當年買樓既決定。呢餐飯，有飯食之餘又有雞脾食…而且講句野都可以大聲啲，而且笑容由心裡笑出來，因為個女可以搵到個有樓…話之你有乜學位有乜沙紙…話之你老豆老母買落定自己買…樓契最緊要。走時外母會問你點解坐多陣…同女入房玩下電腦…

個案六：(私樓，自己買)

女朋友帶你返屋企食飯，伯母問你住邊。

「我住私樓架…雖然響將軍澳…幾年前樓價低果時自己買落…雖然要供，不過供完之後係自己物業…」

成餐飯，你會好開心，好温韾…你會好似多左個老母咁。伯母又會好欣賞你幾年前樓買樓既決定。

呢餐飯，有飯食之餘又有雞脾。