LV出版各地城市《指南》前會派神秘人登門試食、造訪，Julien Guerrier話不論名店、小店都一視同仁。
《路易威登旅遊指南》香港澳門版首次面世，係《指南》在日本以外首個簡介嘅亞洲地區。大家唔使奇怪，LV點解會出版呢本被譽為「時尚旅遊聖經」嘅指南，唔好忘記佢哋以旅行箱起家，而且傳說喺鐵達尼號沉沒多年後嘅勘探行動，打撈上嚟嘅LV皮箱竟然冇滲進海水，係正宗旅行專家，出版旅遊書名正言順。
《指南》有本地酒店、餐廳、酒吧、時裝、美容、商場、畫廊、景點郊遊等共500項推介。LV客戶大部份非富則貴，但咪以為指南只介紹奢侈酒店，或者去蘇富比買珠寶，其實除咗推介四季、半島等名店，連油麻地美都餐室、太子銀杏館都上榜，甚至包括北角渣華道街市熟食中心！對於頗為隱世嘅南灣餐廳，指南認為不容錯過，「雖然南灣餐廳在公廁屋頂，但不要因此敬而遠之」。元朗石崗嘅「農場鮮奶」都獲LV推介。
以神秘人身份到訪
LV噚晚舉行派對，請城中名人睇吓呢本新書。路易威登出版部主管Julien Guerrier話，指南會盡量囊括不同層面景點店舖：「平貴不是重點，最重要是這店有沒有意思。」佢話特派員會以神秘人身份到訪每個景點店舖，評分之餘仲會了解店舖背後古仔，有趣嘅會寫埋落指南；而獲推介嘅店舖都會收到書面通知。
作為時尚旅遊聖經，指南介紹唔少文化景點，有講新光戲院歷史，同埋近年清拆引起嘅爭拗。可能因為參與指南嘅包括本地記者作家，所以《指南》都幾有「態度」，有時介紹食店會加入「社會評論」，例如講長者經營嘅銀杏館，就提及「香港以儒家思想為主導而獲巨大成功，一些老人家生活卻很不穩定」。
時裝方面，有介紹本地設計師，如何志恩嘅設計特色等。佢哋介紹時裝店，未必只講啲衫，例如指南勁讚無印良品海港城店，店面設計體驗禪意。《指南》會請當地人講吓自己嘅故鄉，香港出生嘅精品店AFSO創辦人傅厚民就負責做呢支盲公竹，佢介紹香港特色建築如藝穗會、茶具博物館等。指南在LV店有售，賣310元。
部份食肆推介
from:
http://hk.apple.nextmedia ... art_id=15806000
