有車階級明年起又多一個新玩法，就係粵港兩地私家車自駕遊，諗起可以揸住自己部愛驅穿州過省當然雀躍，不過近期香港人自駕遊喺內地發生嘅交通意外，真係嚇窒唔少人，其實除咗足夠駕駛經驗外，出發前一定要做足功課，咁就萬無一失。
調整駕駛習慣
雖然預計最快下年三月跨境私家車政策先開始實施，不過身邊好多有車階級嘅朋友已經心大心細，想去玩之餘又擔心喺內地揸車好危險。最近我參加某車廠舉行嘅內地試車團，自己嘅駕駛習慣都要作適當調節，先至發現大家的擔心真係有道理。所以今次搵埋經常搞中港駕駛活動嘅香港越野路華四驅車會會長陳孟偉，教定幾招自保法之餘，仲提醒大家凡事離不開一個「忍」字。
1.千奇百怪馬路面
香港唔係快速公路就係市區路，規則大致一樣。不過內地道路網複雜得多，分有國道、公路、鄉道甚至省道，唔同道路都有唔同時速限制之外，佢哋嘅特色都唔少，好似香港高速公路路面唔會見到路人，但喺內地，農民、清潔工人、拾荒者等都會行經公路，甚至橫過馬路；至於鄉道，更可能有農民揸住小貨車逆線行車，揸車時真係要小心。
2.騎線行車
可能內地地方實在太大，揸車時好多人都好心急，所以經常出現一車騎兩線情況，原因當然係想睇邊條線無車就即刻Cut過去，如果有架咁嘅車喺你前面，真係幾煩。不過陳孟偉就話，遇到呢個情況，切忌心急，最緊要抱住一個忍字。
3.隧道越線
香港行隧道Cut線可以話係死罪，但偏偏內地司機呢個陋習就好多人都有，所以入隧道千祈咪咁老定，最緊要留意路面情況，自己當然唔好有樣學樣啦。
4.公路剋星：超載貨車
經常自駕遊內地嘅陳孟偉都話到明，公路上最怕就係遇上貨車，仲要係負載超重嘅貨車，雖然規定貨車只可行駛慢線，不過好多司機對呢個規定都係話知你，唔理自己行得快定慢，話Cut就Cut，所以見到佢哋除咗留意佢哋一舉一動，最好還是避之則吉。
自駕遊須知
1.入97油
香港車主要入邊類型電油當然心中有數，不過內地油品以鋅鋎值分類，分為93及97，唔知揀邊種，97就係最接近本港常用油品。
2.塞車只有等
香港塞起車嚟，一般都係塞一頭半個鐘，不過喺內地閒閒哋可以塞幾個鐘，所以內地司機更容易接受現實，寧願落車鬆一鬆又或者開大餐打發時間，比起香港怨氣冲天，氣氛反而更和諧。
3.公路設備齊
國內新發展嘅公路網每隔二三十公里就會有個休息站、油站、食肆及洗手間，令你無後顧之憂。
自駕遊三寶
急救錦囊
行船跑馬三分險，揸車都一樣，喺內地除咗會發生交通意外，仲有可能遇上屈錢黨，所以唔熟路者，最好搵多幾架車一齊出發，以便互相照應，遇上問題，千祈咪同人拗，要第一時間致電122報警。
粵港自駕體驗班
粵港兩地就過境私家車配額試驗計劃早前已達成共識，最快明年三月可申請一次性內地自駕遊，車輛必須是五座或以下的私家車，雖然詳細情況仍未公佈，但初步所辦費用為人民幣二百四十元，而且必須購有第三者保險。雖然很多人對國內駕車蠢蠢欲動，但又擔心自己毫無國內駕駛經驗，香港汽車會將於11月12及12月3日舉辦兩團國內自駕培訓及體驗之旅，由教練陪同下，自駕遊內地，詳情可致電3583 3601查詢。
from:
http://hk.apple.nextmedia ... art_id=15754745
