個個發夢都想做劉華千嬅，成為明日天王天后！但其實多唱多練，亦未嘗不會踏上星途。除咗約班Friend唱K切磋，最近iPhone亦出咗新App，可結合同廠嘅iRig Mic一齊使用。插住佢邊行邊唱，變身流動K房，隨時發明星夢都得。
連接Mic的3.5mm口可另駁耳筒。
從體積、重量及質感，iRig Mic同一般K房嘅專業Mic真係無乜分別，但講到用途，當然唔止用來唱K！佢底部連住一條3.5mm咪線，可直接插落iPhone或iPad；同時，隔籬仲提供耳筒插口，俾你駁Earphone即時聽番自己嘅錄音；更重要係，呢支iRig Mic具備專門收錄人聲嘅高靈敏度設計，令效果好似喺錄音室製作咁靚聲。
想用佢唱K，就要結合VocaLive一齊用！呢個App上App Store就搵到，免費單撈。無論任何歌曲，只要轉換成專用格式，即可飛走人聲，齋聽純音樂。至於想同時唱K兼錄埋自己把聲，更可直接按下Rec掣即時錄音。它還支援多項微調及特殊效果，操作上可以好簡單，亦可以好複雜。
配Mic Stand搞氣氛
除咗VocaLive，iRig Mic亦支援iPhone現有嘅錄音軟件，亦可配合iMovie或者GarageBand，等佢成為你嘅現場收音工具！但要留意，iRig Mic跟機唔包括耳筒，但會附送一個黑色Mic袋以及Mic Stand轉接器。如果你已經買埋專業Mic Stand，直頭可以夾晒Band一齊錄歌㖭！
VocaLive試玩
http://hk.apple.nextmedia ... ;av_id=15255878
