葉山豪同雷凱欣孭飛嘅3D情慾電影《3D肉蒲團之極樂寶鑑》已經做好後期工作，並將於下月14日上映。原來《3D肉蒲團》保留咗91年由麥當傑執導嘅三級電影《玉蒲團之偷情寶鑑》唔少經典場面，當年《玉蒲團》有一幕講鄭則士幫吳啟華換上馬匹生殖器官嘅場面，令觀眾一看難忘，而《3D肉蒲團》亦有呢場戲。
葉山豪喺《3D肉蒲團》演書生未央生，佢因為同新婚太太嘅性生活唔如意，就去咗寧王嘅「絕世樓」縱慾，其間佢發現原來係自己陽具太細，一直未能滿足性伴侶，於是就搵咗由田啟文（田雞）扮演嘅名醫幫佢換動物陽具，希望可以重振雄風。葉山豪換咗陽具之後，同由日本AV女優原紗央莉演嘅美女瑞珠交歡時，立即達到滿足效果。
拍攝換陽具一幕前，葉山豪已戴咗護陰，不過拍攝時佢瞓喺手術床，田雞作狀縫針竟然錯手拮到葉山豪嘅重要部位，佢立即感受到男人最痛：「嗰刻真係由心痛咗出嚟，不過當時我怕影響拍攝進度，冇立即拆開護陰檢查，但收工拆開護陰就見到少少血迹，搞到我家有少少陰影，怕會性無能。」
問葉山豪現況如何？佢哈哈大笑話：「唔知呀，仲未試，老婆唔喺香港，不過平日生活都冇事，我諗冇受影響啩。」
from:
http://hk.apple.nextmedia ... art_id=15102926
