[資訊分享] MWC 直擊2011 Android玩晒

MWC 2011剛剛完結，今年毫無疑問係Android之年，會場內近9成新機都加入Android陣營。當中最落力嘅一定要數韓國兩大廠Samsung同LG：前者推出兩大旗艦Galaxy S II以及Galaxy Tab 10.1之餘，仲有一系列「銀河」機隊；後者則正式開拓「Optimus」系列，頭炮先嚟支援裸眼3D的Optimus 3D，緊接住嘅係雙核心Optimus 2X，用家揀機都幾頭痕！

俗語有云：「執輸行頭，慘過敗家！」Samsung新機就搶先玩雙核、4.3吋靚芒等勁爆規格，人人注目。雖然LG錯失先機，不過就整番部裸眼3D手機嚟省招牌，睇片、拍片都可以直接玩3D，搞到人人圍觀狂試，搶盡風頭。

LG Optimus 3D 飛甩眼鏡睇3D
裸眼3D手機並唔係第一次出現，之前日系品牌Sharp都曾經玩過，不過論完成度，LG Optimus 3D就高好多。機身內置4.3吋屏幕，平時可以顯示2D畫面，不過一按機側嘅3D鍵，就即刻變成特製嘅LG 3D介面。大家只要將部手機擺遠少少，立體感同距離感就出晒嚟，效果非常突出！最勁係有埋3D YouTube力撐。換言之，可以上網串流睇立體短片，夠晒方便；再加埋內置500萬像素雙鏡頭，又支援高清拍攝，自己影埋、拍埋3D片都冇問題！

LG Optimus系列黑屏雙核
先前香港已經推出過多部Optimus手機，今年MWC繼續發揚光大，當中梗係唔少得Optimus 2X。LG稱2X為「世界上首部雙心核處理器的智能手機」，機身採用Tegra 2雙核心處理器，備有4吋WVGA屏幕、800萬像素鏡頭，講賣點唔算特別，不過依家雙核新世代都應該幾受歡迎。另一部Optimus Black就主打靚芒，備有4吋NOVO屏幕，700nit超光LCD，據講非常適合陽光下使用。機身仲玩薄切，僅得9.2mm，加上支援Wi-Fi Direct新功能，絕對有賣點。不過，呢個年頭仲玩單核心1GHz處理器，到真正推出時可能已經變咗做中階機！

Samsung Galaxy系列機海戰術
Samsung 自從出咗部Galaxy S之後，Galaxy就成為旗下最強嘅手機系列，今年仲會推出中階Android機三寶。Galaxy Ace內置3.5吋HVGA屏幕，採用800MHz處理器，亦支援Wi-Fi N，規格不俗，屬中階機之選。另一部跟Ace十足孖生兄弟嘅Gio，只係改用上細少少嘅3.2吋HVGA屏幕，同樣擁有800MHz處理器、Wi-Fi N等功能，似乎想嚟個機海戰術。而Galaxy Fit則明顯為女士而設，鵝蛋形機身較為纖巧，備有特別嘅3.31吋寬屏幕，亦內置500萬像素鏡頭；不過處理器僅得600MHz，較適合入門用家。