李連杰、周迅同陳坤主演、由徐克執導嘅3D武俠片《龍門飛甲》日前終於完工，噚日佢哋就喺北京舉行煞科記者會，徐克率領一眾演員出席，周迅同緋聞男友陳坤都大方同場，桂綸鎂同范曉萱亦有現身，但係男主角李連杰就缺席，真係失色咗少少。
記者會開始前大會播咗一段約30秒嘅3D片段，仲派咗專用眼鏡畀現場傳媒用，可惜片段完全冇演員出現，難免有啲失望，但係3D效果就真係相當唔錯。
之後徐克率先出場大講感受，佢話：「拍攝時現場溫度很低，令人跟機器運作都不正常。」台上又擺放幾位主角嘅紙牌，主持要周迅等人上台時揀喺戲中印象最深刻角色嘅紙牌，結果周迅唔怕緋聞照揀陳坤，佢話：「陳坤演大反派，當中的人物關係很難演。另外我有很多動作鏡頭，有時NG足足30至40次，令我自信崩潰。」陳坤今次演出要挑戰李連杰，佢笑笑口話：「我覺得是挑戰泰山之巔，差點想退錢走人。」
另外，桂綸鎂上台時，回想起拍攝時嘅辛苦情景，竟然忍唔住當眾落淚，周迅見狀即遞上紙巾畀佢抹眼淚。有份演出嘅李宇春就話，覺得最難演嘅係感情戲，因佢冇乜經驗喎。
from:
http://hk.apple.nextmedia ... art_id=14903886
