鄭裕玲（嘟嘟）同廖碧兒兩個感情遇過挫折嘅女人，噚日去到演藝學院欣賞三度公演嘅舞台劇《一屋寶貝》，另外撐場嘅仲有黎瑞恩同汪明荃等。呂方最近接受訪問時，直指話以前同嘟嘟拍拖嗰16年好似坐監咁，報道出街後唔少人替嘟嘟感到唔抵。
噚日記者問嘟嘟關於呂方嘅問題時，嘟嘟起初仲大方話：「都預咗你哋會問呢啲，我自己都想講下。首先恭喜呂方演唱會成功先，我哋都分開咗咁多年，唔想每次有乜問題都搵番對方問，已經分開咗三年喇，總之祝福佢演唱會同感情都有好發展，我做咗呢行咁耐，明白大家已經當我係朋友咁關心我，大家唔使擔心我，以後私人嘢唔再回應喇！」
但當記者再追問嘟嘟對呂方嘅「坐監論」睇法時，佢即刻唔耐煩話：「咪講咗私人嘢唔答囉！」
同樣情場失意嘅廖碧兒，就話冇睇過陳豪拒「回收」佢嘅報道，佢仲笑住話：「所有報紙雜誌我都冇睇過，家只係專注喺工作上，新一年希望開開心心，嚟緊我會出trip幫TVB拍嘢！」問佢會唔會因為形象差而被飛出力捧名單上？佢即死撐話：「廣告客戶一向都好支持我！」
from:
http://hk.apple.nextmedia ... art_id=14895075
