已經係大馬女婿嘅劉德華近日喺當地宣傳新戲《新少林寺》，佢前日接受訪問時已經認咗大馬女婿呢個身份，但講到家事時，就不停叫記者乖啲唔好問，不過佢最終經唔起追問，佢話上年新年已經開始派雙封利是，即係佢都好傳統，婚後開始派利是就派雙封囉。
華仔講過因為想生仔先結婚，咁橋戲裏面佢係個嚴父，唔知現實中佢會係個點嘅老竇？華仔用普通話話：「不知道，到時才知道吧！我相信我會是個嚴父，不過我有個朋友本來也很嚴肅，生了女兒後卻變另外一個樣了。」
講番套戲裏面帶出好多少林寺嘅精神，而「活得自在」呢句對白就令佢最深刻，佢話做人最緊要識得放低同放鬆喎，咁佢仲有乜事係放唔低呢？華仔話：「放不下的太多了，如果我放得下，早就出家了。」惹得全場大笑。
到夜晚嘅歌迷見面會，華仔同啲歌迷話返大馬有「回家的感覺」，冧到啲粉絲咿嘩鬼叫。華仔噚日已經飛咗去新加坡繼續宣傳，佢仲答應大馬記者話嚟緊會多啲留喺大馬喎？
此外，華仔同鞏俐合演《我知女人心》會喺情人節檔上映，佢喺戲入面都大騷舞技，不停同啲靚女跳舞，其中一個竟然係年過半百嘅姨姨，華仔話：「跳社交舞對我嚟講冇難度，第一次拍戲跳舞要換咁多女伴，尤其做我鐘點女傭嘅姨姨，佢本來唔識跳嘅，點知跳起嚟特別有味道。」內地影帝葛優都去探班，仲話有戲上同其他人對撼都唔係問題，但遇着華仔加鞏俐就令佢心慌慌喎！
from:
http://hk.apple.nextmedia ... art_id=14891382
