內地名導演姜文前晚帶着妻子周韻，與劉嘉玲和葛優等來港出席電影《讓子彈飛》首映。看見人家夫妻恩愛，嘉玲也禁不住當眾大讚老公梁朝偉是其心目中英雄，又說：「佢心胸度量都好大，對媽咪同女人都做到一個負責任嘅男人應該做嘅嘢。」
內地導演姜文前晚率領葛優、劉嘉玲和周韻等，在圓方為明天在港上映的新片《讓子彈飛》舉行首映，鄭裕彤、霍震霆、何超瓊、容祖兒和古巨基等都有捧場。該片在內地上映四周，票房已逾六億，前晚眾人開香檳慶祝。
姜文和太太周韻很少一同出席公開場合，前晚兩人大方露面。雖然梁朝偉沒現身撐老婆，但嘉玲也替老公笠高帽。當司儀問她覺得姜文和葛優哪一個像土匪，哪一個像惡霸時，她回答：「每個人都有可能是土匪或者惡霸。」司儀又問她覺得梁朝偉是哪種？嘉玲說：「關佢乜事呀？佢係英雄。」
事後嘉玲和姜文一同接受訪問，嘉玲解釋偉仔是英雄的原因：「佢喺我心目中係英雄，愛錫女人嘅男人就係英雄，佢心胸度量都好大，對媽咪同女人都做到一個負責任嘅男人應該做嘅嘢。」談到《讓》片拍續集，嘉玲即問姜文自己是否符合資格參與，姜文說：「符合。」嘉玲又謂在《讓》中戲份不多，她說：「好冇癮，未過到戲癮。」她直言希望在續集能加戲份，姜文即答會。會否加片酬？嘉玲說：「唔會，拍到好戲已經好好，我哋對香港票房有信心，好有期望，有啲朋友睇咗好鍾意，未睇嘅好期待。」她謂希望能與周潤發多點對手戲。
同場的容祖兒坦言仰慕發哥和姜文，可惜是夜發哥沒出席，她說：「好想見佢一面，其實我同佢有幾面之緣，一次喺salon整頭，我冇化妝成個癲婆咁，佢叫我唔好郁影咗張相，仲晒番黑白相畀我；後來有次喺酒店食飯，佢俾我啲同事圍住影合照，都冇唔耐煩，真係好好人。」
問祖兒會否自薦演出《讓》續集，她說：「唔好搞到人哋，人哋成績咁好，睇有冇機緣客串啦。」前晚來捧場的楊凡為好友林青霞帶話，表示青霞祝福姜文，並稱《讓》片是她近10年看過最好看的電影，又送六字真言給姜文，就是讚他「天才天才天才」。
from:
http://hk.apple.nextmedia ... art_id=14859476
