堪稱一代銀幕情侶的劉德華和關之琳，相隔多年終於再度聚頭。前晚之之以低胸短裙look現身，擔任華仔演唱會嘉賓，艷光四射。她更大開金口跟華仔手拖手合唱，令現場嘩聲四起。華仔坦言當年傳媒吹噓，曾令他一度以為會和之之撻着甚至結婚，不過最終還是各自覓得真愛。
在紅館舉行的「劉德華Unforgettable演唱會」前晚演出至第19場，雖然來到尾聲，華仔依然落力演出。當晚他如常請來份量十足的嘉賓助陣，便是他的銀幕另一半關之琳。
久違了的之之穿上藍色低胸短裙，蜜運中的她艷光四射，她甫出現即全場嘩然，華仔笑說：「傳媒渲染力真係幾犀利，我真係以為會同佢結婚，連我都蒙騙埋。」之之見到華仔則笑問：「有冇心跳呢？」隨後兩人來個相擁，之之還笑問華仔她硬質地的低胸裙上圍可有「哽」到他，華仔表示演唱會請來曾跟他有關係的朋友做嘉賓，之之聞言笑說：「你30年裏面，其實我都佔咗你10年。」華仔笑說：「其實我哋秘密咗10年，大家唔知道呢。」
接着華仔和之之十指緊扣合唱《明星》，華仔透露：「我叫佢自己一個唱，但佢死都唔肯，所以我陪佢唱。」華仔唱時又冧爆地將頭挨在之之膊頭，並笑說：「好似結婚咁。」
華仔的「三虎」好兄弟包括苗僑偉（三哥）、黃日華和湯鎮業也是嘉賓，四人互窒搞氣氛，華仔取笑三哥：「我喺『i窿』同咩博度成日見你整個chok樣，家整個chok樣畀大家睇睇。」三哥二話不說馬上chok上面。
發福不少的湯鎮業對華仔說：「見你有八嚿腹肌，你唔應該自己擸晒，應該分豬肉，每人分番兩嚿。」黃日華聞言搞鬼取笑湯鎮業說：「唔使啦，應該係你擸晒。」最後四虎在台上合唱《一起走過的日子》。
from:
http://hk.apple.nextmedia ... art_id=14849502
