最愛扮鬼扮馬的詹瑞文近日接拍了王晶執導的電影《猛男滾死隊》，晶哥未知是否看中他扮乜似乜，日前就要他化身史力加現身旺角街頭，即時吸引近百人圍觀。詹sir這隻「史力詹」玩轉旺角，途人均沒認出他，搞到他變成一隻人見人怕的綠色巨無霸，他笑言晶哥今次認真大整蠱。
詹瑞文和徐自賢日前化身史力加和費安娜公主，在旺角拍攝王晶執導的新片《猛男滾死隊》，雖然二人只是逗留短短五分鐘，但已吸引近百市民圍觀。
一身綠色史力加造型的詹瑞文，拖着徐自賢以小跳步在旺角遊走，其間二人擺出親嘴和扭屁股動作，非常搞笑。身為Giordano代言人的詹瑞文，更走入店舖為徐自賢揀衫。
事後問詹瑞文化這妝有何感受？他笑說：「好得意，啲人見到我又唔認得我，見佢哋見到呢隻綠色巨無霸好似好驚咁，但又想走過嚟影相，都幾好笑！」詹瑞文說足足花了五個多小時化妝：「倒模用咗兩個鐘，齋化呢個面就用咗五個鐘。落隻手個妝就要半個鐘，我諗塊面都要落成個鐘！晶哥今次都算大整蠱，化呢個妝都冇人認得我，所以其實邊個扮都得！」
詹瑞文透露片中角色叫張秋雲，他表示：「我演一個影帝，個名集合咗張家輝、黃秋生同劉青雲三位影帝，個角色係會成日扮鬼扮馬女友，之前已經扮過《吸血新世紀》嘅Edward。晶哥仲想我扮埋阿凡達，但係因為我之後要排《踢館》呢個舞台劇，不過時間唔夠就冇做。」
from:
http://hk.apple.nextmedia ... art_id=14839861
