於無綫歌唱比賽《超級巨聲》中奪冠的林欣彤（Mag）備受無綫重用，昨日她處女下海，首次參與拍攝邵氏電影《我愛香港》。飾演銷售員的Mag穿上Lolita服飾於旺角拉客，吸引過百人圍觀。
林欣彤、o靚模許穎及小肥，昨日在旺角行人專用區拍攝電影《我愛香港》外景。劇情講述飾演Online Game推銷員的Mag及許穎，穿上Lolite服飾在旺角街頭派傳單，由於Mag的打扮過於密實，沒有客人幫襯，最後由飾演o靚模經理人的小肥教路，要求Mag解開衫鈕，以及做出「港女十式」自拍甫士。
第一次拍戲的Mag到場後細心聽導演指示，正式埋位時也應付自如，反而小肥卻忘記對白NG了兩次。雖然o靚模許穎以低胸打扮上陣，引來一班龍友拍照，不過圍觀的市民不時叫Mag的名字，有些更讚她可愛。
事後Mag表示第一次拍戲很緊張，亦怕拖累有份演出的吳君如，Mag說：「第一次拍戲就喺街頭好多人圍觀，我暫時都唔知自己多唔多戲份，我好開心可以拍戲，因為好新鮮，酬勞我都唔清楚有幾多，同埋我唔知幾時會見到吳君如，我怕自己會拖累到佢。」
記者指無綫十分器重Mag，她說：「都係有一個機會畀我學習。」問Mag會否有機會唱電影主題曲？她說：「我唔清楚呀，有機會梗係想啦。」對於獲市民支持，Mag感到十分高興，她說：「有啲市民叫我加油同埋話會支持我，我好開心。」
此外，小肥到場時居然認不到Mag，他說：「佢扮到咁我唔認得佢呀，不過我之前都有聽過佢唱歌，我都好想同佢合作，同一啲勁人一齊唱一定好好玩。」
from:
http://hk.apple.nextmedia ... art_id=14612200
