噚日天氣雖然轉凉，但有人同馮仁昭報料，話下晝喺港島區南灣沙灘見到百果園E神陳靜（DaDa）着住三點式泳衣游水。馮仁昭趕去現場，果然見到性感惹火嘅DaDa喺度，但原來佢唔係去游凍水，而係拍緊王晶公司嘅新戲《潮性辦公室》。
噚日除咗DaDa之外，仲有呂慧儀以及早排同霍啟剛傳過緋聞嘅台灣女主播趙彤，佢哋兩個一樣着住三點式喺沙灘拍戲。見DaDa同趙彤俾幾個猛男用水槍係咁射水，都依然笑騎騎搏到盡投入拍攝，女人嘅抵冷能力真係唔到你唔服。
DaDa近期走勢唔錯，密密接job銀，佢除咗拍《潮性辦公室》之外，嚟緊仲會同鍾鎮濤、鄧麗欣一齊拍《宅男總動員》，正式進軍內地市場。另外，DaDa年底除咗推出性感寫真月曆之外，原來仲斟緊出一個「叫床」嘅iPhone app。不過大家聽到叫床呢兩個字千祈唔好諗歪，呢個「叫床」app其實係叫人起床咁解，絕對冇色情成份。聽聞DaDa到時會錄超過100款唔同嘅真人發聲聲帶，例如好溫柔咁話：「儍豬，夠鐘起身啦！」當然，個app會配合埋DaDa嘅靚女相，等人當正DaDa係女朋友甚至老婆看待。
from:
http://hk.apple.nextmedia ... art_id=14591672
