蔡卓妍（阿Sa）自被本報踢爆同陳偉霆（William）拍拖後，罕有高調承認，之後都一臉甜蜜講新戀情，阿Sa日前接受無綫娛樂新聞台訪問，話William已經見過Sa爸。
老竇對新男友評價係點？阿Sa甜絲絲話Sa爸冇乜評論，只係好支持佢，只要佢開心就得。阿Sa又話同William都係天蠍座，所以好合拍，有好多共同話題同興趣，一齊踩吓單車，傾吓時裝就好滿足。講到咁sweet，有冇嗌過交呢？阿Sa就話每次都係其中一方先軟化，好自然好快就冇事喎。
阿Sa話之前同鄭中基嘅婚姻選擇唔公開，令佢哋失去好多雙方應該擁有嘅共同回憶，點知到公開後又有大量負面報道，吸取教訓後，今次佢同William希望可以簡單處理，輕鬆面對，只係估唔到公開反而被懷疑為宣傳假拍拖，阿Sa仲話：「我同William約法三章，唔睇任何報章雜誌，只要活在當下，唔聽流言，只在乎自己開心嘅心態去面對。」
至於會唔會情侶檔合作，阿Sa話唔想感情事太高調，所以暫時唔會住喎。日日講住都算唔高調？阿Sa噚日去咗電台做訪問，之後第一時間影相貼上微博，仲留言話好想放個假，馮仁昭覺得佢想黐住男友拍拖就真。
from:
http://hk.apple.nextmedia ... art_id=14555061
