蕭定一急召開會，原先三人行嘅Freeze，只得甄穎珊同石詠莉約埋搭的士，飛起陳樂榣。
Freeze嘅甄穎珊同陳樂榣，因為借錢傷感情隔空開火，鬧到姊妹都冇得做，Freeze仲面臨散band。老闆蕭定一為咗平息呢場風波，早前call晒整容三嬌返灣仔公司開大會，叫佢哋三口六面講清楚。二五收到風即時趕去現場，見到甄穎珊同石詠莉一齊飛的到，而陳樂榣一早就自己到咗。聽聞個會好重火藥味，一早為自己鋪定後路教畫畫嘅陳樂榣擺明唔志在份工，反面就反面，老闆做和事佬都冇用。
雖然話就嚟散band，但公司仲不時安排Freeze去練舞，甄穎珊同陳樂榣次次都唔會同一時間出現，練完走都係前後腳，兩個全程面左左，總之有你就冇我。睇嚟Freeze都係咁大o架喇，陳樂榣唔撈，甄穎珊又話開餐廳，最慘就係石詠莉，左右做人難，無端端做咗夾心人，仲分分鐘俾兩個好姊妹連累冇得撈！
陳樂榣向來比較慳，情願搭完巴士轉地鐵，真係慳得一蚊得一蚊。
