無綫自從同四大唱片決裂後，上節目做嘉賓嘅歌手來來去去都係嗰幾間公司，觀眾唔悶，馮仁昭都睇到厭，所以無綫就落力栽培《超級巨聲》，特別係聲勢如虹嘅林欣彤，家無論大細騷，無綫都會安排林欣彤上陣，大晒佢嘅唱功，實行力捧佢做「巨聲幫」中之巨星，嚟緊林欣彤仲有機會同《全英一叮》嘅英國男歌手Paul Potts喺《勁歌金曲》中合唱。
林欣彤噚晚就率領巨聲二幫嘅成員到將軍澳電視廣播城錄影《超級巨聲2畢業演唱會》，到場仲有周秀娜等人。近日有傳林欣彤會以400萬身價簽約英皇，不過噚晚佢就話一切都係等無綫安排，仲話價錢唔係問題，最重要係理念一樣，不過佢都話有興趣拍戲，但主力都係唱歌先。
呢期林欣彤熱爆，佢都忍唔住同馮仁昭呻話自己家學業工作兩兼顧，令佢身體都開始出現問題，成日都好攰，所以佢都想考慮清楚之後嘅方向。
另外，周秀娜會同二幫成員吳業坤合唱《小酒窩》，吳業坤出名一緊張就會勁出汗，周秀娜踢爆對方話：「喺綵排時坤哥緊張到勁出汗，我冇諗過佢咁緊張，諗住送佢手套，點知搞到佢出晒水，真係唔好意思，成對手套都濕晒。」似乎女神魅力認真驚人。
from:
http://hk.apple.nextmedia ... art_id=14515628
