迪士尼郵輪夢想號嘅水上過山車Aqua Duck，部份伸到船外，下面係茫茫大海。迪士尼提供圖片
迪士尼除咗有樂園，其實仲有郵輪。華特迪士尼郵輪及旅遊營運高級副總裁及首席財務總裁James M Heaney話，發現Magic號、Wonder號經常爆，要起多兩隻，分別係Disney Fantasy同Disney Dream（夢想號）。前者2012年先推出，夢想號喺今年12月9日下水，下年1月首航，比現有嘅噸位大一倍至12.8萬噸，高達14層，可以容納4,000賓客。
夢想號最犀利係首個郵輪上有過山車Aqua Duck，15層咁高，車軌頭段會喺漆黑室內，有啲似飛越太空山咁滿天星星，但之後會衝到戶外路軌，部份仲係伸到船舷外，坐喺上面好似吊喺半空咁，飛嚟飛去，下面已經係茫茫大海，咪話唔驚。
房間窗口係虛擬舷窗
房間窗口係虛擬舷窗（Virtual Porthole），其實係高清屏幕，隨天氣變換成藍天白雲或驚濤駭浪。船上又有魔法掛畫，畫中卡通人物，你一走近會變成你或者同行人士嘅樣。
郵輪上又設有獨立一層專畀年輕人同小朋友，大人就有「細路免進」嘅泳池Quiet Cove Pool、Night Club，唔知白雪公主會唔會偷偷去蒲？仲有首輪3D電影院、熱帶雨林Spa，當然唔少得海上煙火。迪士尼郵輪係唯一喺巴哈巴擁有自己沙灘嘅郵輪，岸邊可以潛水同滑水。
係咪好想去呢。大家可以飛去美國坐，可以花3至11晚，遊加勒比海、地中海，甚至今個夏天新開嘅阿拉斯加。遲啲有機會可以喺香港上船，因James啱啱成為香港郵輪業諮詢委員會委員，又讚南中國發展潛力大，睇怕郵輪嚟港指日可待啦。想訂郵輪可以睇吓網頁
http://disneycruise.disney.go.com。
